Парламент Казахстану на супольным паседжанні 20 сакавіка перайменаваў сталіцу краіны Астану ў гонар цяпер ужо былога яе прэзідэнта Нурсултана Назарбаева. З сёння галоўны горад Казахстану носіць назву Нурсултан, паведамляе inbusiness.kz.
Спачатку казахскі ўрад прапанаваў вынесці гэтае пытанне на рэферэндум, але прэзідэнт Касым-Жамарт Такаеў пастанавіў накіраваць прапанову на разгляд парламента без вынясення на рэферэндум.
Падчас абмеркавання ад дэпутатаў паступіла толькі адна прапанова – ухваліць законапраект у першым чытанні. Дэпутаты прагаласавалі аднагалосна.
Як патлумачыў у кулуарах міністр юстыцыі Марат Бекетаеў, закон прыняты, і з сённяшняга дня Астана перайменавана ў Нурсултан.
Астана была заснаваная ў 1830 годзе як Акмолінск. Гэтую назву горад насіў да 1961 года, калі быў перайменаваны ў Цалінаград. У 1992 годзе яму прысвоілі назву Акмала, а ў 1997-ым – Астана. Тады ж сюды была перанесеная сталіца Казахстану.
Дарэчы, у суседнім Туркменістане ў гонар былога прэзідэнта Сапармурата Ніязава, які насіў тытул Туркменбашы (кіраўнік туркменаў), названыя горад, два пасёлкі, аэрапорт, затока ў Каспійскім моры ды банк. Таксама назву «туркменбашы» некаторы час насіў месяц студзень.
МГ belsat.eu