Агулам Беларусь праявіла цікавасць да паставак нафты і нафтапрадуктаў з Казахстана ў абʼёме каля 3,5 мільёнаў тон за год.
«Беларускі бок выказаў цікавасць не толькі да паставак нафты, але і да пастаўкі прадуктаў, магчымых для перапрацоўкі, такіх як газойль, мазут, сумарны абʼём каля 3,5 млн тон на год. Гэта нафта і нафтапрадукты», – цытуе ТАСС словы намесніка міністра энергетыкі Казахстану Асэта Магаўва.
Ён адзначыў, што палову з названага абʼёму можа складаць нафта, яшчэ палову – цёмныя нафтапрадукты як сыравіна для нафтаперапрацоўкі.
«Цяпер мы вядзем перамовы менавіта пра механізм: індыкатыўныя балансы, графікі паставак. Гэта значыць рэгулятыўны механізм, каб гэтыя пастаўкі былі зроблены. А камерцыйныя дэталі – хто будзе прадаваць, па якім кошце – гэта пытанне наступнага этапу», – растлумачыў віцэ-міністр.
У сваю чаргу канцэрн «Белнафтахім» разлічвае, што ў кастрычніку, падчас візіту ў Казахстан кіраўнік Беларусі Аляксандр Лукашэнка падпіша пагадненне з кіраўніцтвам гэтай краіны аб гандлі нафтай і нафтапрадуктамі, паведамляе interfax.
«Пагадненне адпрацаванае, плануецца, што яно павінна быць падпісана ў кастрычніку. Магчыма, што гэта адбудзецца падчас візіту кіраўніка дзяржавы ў Нур-Султан», – паведаміў намеснік старшыні канцэрну «Белнафтахім» Уладзімір Сізоў.
Пры гэтым Сізоў удакладніў, што ў дамове не прапісаныя аб’ёмы, абумоўленыя толькі ўмовы паставак.
СК belsat.eu