Фізічны і энергетычны пуск першага энергаблоку БелАЭС запланаваны на лета і восень гэтага года. Пра гэта распавёў міністр энергетыкі Беларусі Віктар Каранкевіч 11 красавіка ў эфіры тэлеканалу АНТ.
«Па фізічным пуску мы арыентуемся гэта ліпень месяц, адпаведна, выдача першых кілават электрычнай энергіі – гэта верасень-кастрычнік», – сказаў Каранкевіч.
Паводле яго слоў, цяпер арыентуюцца на гэтыя графікі, аднак дапускаюць карэктывы, на якія аператыўна зрэагуюць.
Раней у Дзяржатамнаглядзе заявілі, што каронавірус можа адбіцца на тэрмінах запуску БелАЭС.
На гэтым тыдні ў 15 грамадзянаў Расеі, якія прыбылі працаваць на АЭС у Астравец, выявілі каронавірус. Усе хворыя шпіталізаваныя і ізаляваныя. У выніку каля 100 чалавек з будоўлі БелАЭС былі таксама адпраўленыя ў шпіталь.
БелАЭС – гэта сумесны расейска-беларускі праект. Літва і Польшча выступалі з крытыкаў узвядзення атамнай станцыі ў блізасці ад іх межаў.
КА belsat.eu