Стала вядома, калі Беларусь плануе далучыцца да СГА


Майка Ашыкава і Андрэй Еўдачэнка. Фота - Ірына Арахоўская, belsat.eu

Урад Беларусі лічыць магчымым завяршыць працэс далучэння краіны да Сусветнай гандлёвай арганізацыі да 2020 года. Пра гэта было заяўлена падчас Кастрычніцкага эканамічнага форума ў Менску.

Дырэктарка дэпартаменту аб далучэнні новых краінаў Сакратарыяту СГА Майка Ашыкава заявіла, што такія ўступныя тэрміны былі агучаныя прэм’ер-міністрам Сяргеем Румасам.

«Здаецца, упершыню ад ураду Беларусі мы пачулі канкрэтныя арыенціры. Гэта дастаткова моцны сігнал чальцам Сусветнай гандлёвай арганізацыі, што Беларусь ставіцца да гэтага сурʼёзна. Я думаю, што гэта амбіцыйная, але рэалістычная мэта», – падкрэсліла Ашыкава.

Гэтыя ацэнкі пацвердзіў першы намеснік міністра замежных справаў Беларусі Андрэй Еўдачэнка.

Намеснік кіраўніка МЗС Андрэй Еўдачэнка. Фота – Ірына Арахоўская, belsat.eu

«Не ведаю, ці выратуем мы Сусветную гандлёвую арганізацыю сваім далучэннем, але мы стаім на гэтым шляху. За два апошнія гады мы прайшлі больш, чым за папярэднія 23. У нас засталіся перамовы з сямю самымі цяжкімі краінамі. Мы спадзяёмся, што да першага кварталу 2019 года мы завершым перамовы з усімі апроч ЗША», – распавёў ён.

Майка Ашікава. Фота – Ірына Арахоўская, belsat.eu

Майка Ашыкава ў сваю чаргу адзначыла:

«Беларусь знаходзіцца ўжо 25 гадоў у працэсе далучэння да Сусветнай гандлёвай арганізацыі. Звычайна такі шлях для краінаў займае трохі больш за 10 гадоў. То бок гэта займае ў Беларусі трохі больш часу, чым хацелася. Мяркую, нарэшце надышоў час завершыць гэты працэс».

Яна дадала: за апошнія 2-3 гады Беларусь дасягнула значнага прагрэсу ў гэтым накірунку.

У цэнтры – намеснік кіраўніка МЗС Андрэй Еўдачэнка. Другая злева – кіраўніца дэпартаменту СГА Майка Ашыкава

Беларусь – апошняя краіна Еўропы, якая спрабуе ўступіць у СГА. Перамовы аб уступленні пачаліся яшчэ ў 1993 годзе, у 2015 годзе яны актывізаваліся. Між тым Аляксандр Лукашэнка неаднаразова выказваў сумненні аб неабходнасці далучэння Беларусі да СГА. «Некаторыя мае калегі ў вузкім коле, калі мы абмяркоўваем гэтае пытанне, кажуць, што СГА фактычна сябе вычарпала», – адзначыў, у прыватнасці, Лукашэнка 29 сакавіка 2016 года.

ІІ, belsat.eu

Глядзі таксама
Каментары