На запыт «Белсату» генеральны дырэктар стадыёну Васіль Аляксеенка паведаміў пра даты, калі месца будзе гатовае да правядзення масавых імпрэзаў.
25 лютага адміністрацыя «Дынама» у адказе на запыт нашага каналу паведаміла, што стадыён будзе гатовы да правядзення канцэртаў і іншых імпрэзаў толькі пасля тэставання абароннага пакрыцця футбольнага газону.
Паводле кіраўніцтва ўстановы, на стадыёне цяпер няма пакрыцця травянога газону. Яго трэба набыць і пратэставаць – у «выпадку своечасовай пастаўкі» гэта супадзе па часе з датай правядзення святочнага канцэрту да Дня Волі.
«Гатовасць стадыёну «Дынама» да правядзення імпрэзаў […] адбудзецца не раней за красавік», – гаворыцца ў паведамленні.
Заяўку гарадскім уладам на правядзенне святочнага канцэрту 24 сакавіка на стадыёне «Дынама» падала культурніцкая пляцоўка «Арт Сядзіба».
«Згодна з заканадаўствам, заяўку аб правядзенні масавага мерапрыемства мы падавалі ў Менгарвыканкам і чакаем ад яго афіцыйнага адказу», – кажа адзін з арганізатараў імпрэзы Павел Белавус.
Праз краўдфандынг у «Фэйсбуку» на святкаванне Дня Волі сабралі ўжо больш за 15 тысячаў рублёў. Грошы паступаюць у агульны фонд «Дня Волі» і будуць выкарыстаныя на розныя мэты: інфармацыйная кампанія (ролікі, налепкі, улёткі, плакаты, актыўнасці ў сацсетках), мерапрыемствы (як малыя, так і вялікія ў Менску ды іншых гарадах.
Летась на канцэрт на Дзень Волі 25 сакавіка да менскай оперы прыйшло некалькі дзясяткаў тысяч чалавек. «Белсат» ладзіў трансляцыю імпрэзы ў жывым эфіры.
Сёлета арганізатары плануюць адзначыць нацыянальнае свята з яшчэ большым размахам.
- 1 траўня на стадыёне «Дынама» адбудзецца канцэрт Аляксандр Саладухі.
ДД
