Маладзечанскі завод парашковай металургіі і выданне «Рэгіянальная газета» заключылі міравое пагадненне.
«Завод адмовіўся ад сваіх патрабаванняў у поўным аб’ёме і абавязаўся кампенсаваць нашаму выданню палову выдаткаў на аплату паслугаў адваката», – распавёў Belsat.eu Аляксандр Манцэвіч, галоўны рэдактар «Рэгіянальнай газеты».
У позве завод патрабаваў ад выдання зняпраўдзіць апублікаваную інфармацыю ды абавязаць рэдакцыю падаць інфармацыю аб асобе, якая даслала фота выданню, каб прыцягнуць яе да адказнасці.
Нагадаем, што летась у кастрычніку «Рэгіянальная газета» апублікавала фота з прыбіральні Маладзечанскага заводу парашковай металургіі, на якім відаць, што мыла прывязанае да крану. Прадпрыемства палічыла, што публікацыя правакацыйная і падрывае дзелавую рэпутацыю ды падало позву ў Эканамічны суд Менскай вобласці.
ЮВ belsat.eu