21-гадовы цяжкахворы нарадзінец Украіны, які з 5-гадовага ўзросту жыве ў Беларусі, цяпер у Пінскай цэнтральнай больніцы.
Юрый распавёў belsat.eu, што яму трошку лепш і да яго добра ставяцца.
«Я ўсім задаволены. Чакаю рашэння аб грамадзянстве, аднак пакуль мне нічога не паведамлялі».
У Пінскім аддзеле міграцыі інфармацыі пра грамадзянства Юрыя няма. Адказу чакаюць з Берасцейскага РАУСу.
У каментары belsat.eu намеснік начальніка аддзелу Берасцейскага АУСу Алег Кавальчук сказаў, што справа хлопца – на разглядзе ў Адміністрацыі прэзідэнта.
«Справа вельмі пільная. Мы робім усё, каб яму дапамагчы. І спадзяюся, што паспеем. Дакументы ў Менску на асаблівым кантролі. Трэба яшчэ крыху пачакаць».
Хто такі Юрый Амяльчук
Юрый Амяльчук скончыў у Беларусі школу і каледж. Раней не меў сур’ёзных захворванняў, але падчас адпрацоўкі ў лістападзе 2016 года ў хлапца выявілі саркому косці. На аперацыю дапамаглі сабраць грошы валанцёры.
У ліпені 2018 года ў Юрыя знайшлі пухліну ў лёгкім, а пазней – двухкамерную кісту, якая пачала імкліва разрастацца і душыць унутраныя органы. Аперацыя на лёгкім – у межах 5–6 тысячаў долараў. Кошту аперацыі па выдаленні кісты лекары ўвогуле не паведамляюць. Зноў сабраць такія грошы сямʼя Юрыя не ў стане.
Хлопца не хацелі лекаваць бясплатна, бо ён не мае беларускага грамадзянства. Аднак пасля розгаласу справаю Юрыя занялася Адміністрацыя прэзідэнта.
Гісторыю Юрыя глядзіце ў нашым рэпартажы
ДР belsat.eu
