Гэтае маляўнічае возера, як ні дзіўна, ёсць сведчаннем заняпаду заможнага жыцця ў пасёлку Усвіж-Бук на Талачыншчыне.
Некалі тут кіпела торфаздабыча, пасля балоты пакрысе ператварыліся ў возера. Але, нягледзячы на заняпад прамысловасці, гэткаму прыроднаму набыццю мясцовыя жыхары вельмі цешацца.
ВІКТАР, МЯСЦОВЫ ЖЫХАР
«Сюды адпачываць прыязджаюць не толькі Талачынскі раён, тут і Круглае, і Магілёў, тут і Ворша. База адпачынку можна сказаць».
Ці, як іх яшчэ называюць, «Талачынскія разлівы» – з унікальнай экасістэмай, разнастайнай флорай і фаўнай. Але ўлюбёнае месца тутэйшых і гасцей аказалася пад пагрозаю: супольная беларуска-дацкае прадпрыемства «Белдан» будуе тут гіганцкі свінакомплекс на 50 тысяч галоваў. Жыхары небагатага рэгіёну, з іхных уласных словаў, нават і не супраць зʼяўлення прыбытковага прадпрыемства.
СЯРГЕЙ ПЛЯСКАЧ, МЯСЦОВЫ ЖЫХАР:
«Усе за тое, каб гэты абʼект безумоўна ў Талачынскім раёне быў. Абурае толькі месца, дзе вырашылі яго пабудаваць».
А гэта акурат ля возера ды яшчэ на ўзгорку. І хоць кампанія запэўнівае ў экалагічнасці будучага прадпрыемства, жыхары мяркуюць, што гэтая справа літаральна «кепска пахне».
СЯРГЕЙ ПЛЯСКАЧ, МЯСЦОВЫ ЖЫХАР:
«Меліяратыўныя каналы, якія ўпадаюць у возера падыходзяць пад самыя муры гэтай фермы. Таму якія б там збудаванні не будаваліся, усё роўна бруд будзе трапляць у возера».
Пахваліцца тэхналагічнымі навінкамі ачышчальных збудаванняў і супакоіць насельнікаў Усвіж-Буку кіраўніцтва «Белдану», на жаль, не захацела.
АНТОН ГАВАРКО, ДЫРЭКТАР «БЕЛДАНУ»:
«Ведаеце, я зараз не гатовы размаўляць на гэтую тэму».
Жыхары ж чакаюць уцямнай справаздачы: чаму менавіта гэтае месца выбралі пад будаўніцтва і ці не нашкодзіць свінакомплекс прыродзе.
ЯЎГЕН, МЯСЦОВЫ ЖЫХАР:
«Нас інфармуюць, што мы бекон будзем есці скора і ўсё, а вось, што туды нешта можа паплыць».
А вось у Талачынскім выканкаме запэўніваюць, што хвалявацца наконт экалогіі няма падставы, а калі і трэба было гэта рабіць – то, маўляў, на грамадскіх слуханнях увосень.
МІКАЛАЙ САЛТАНАЎ, УПРАЎЛЕННЕ СЕЛЬСКАЙ ГАСПАДАРКІ ТАЛАЧЫНСКАГА РАЙВЫКАНКАМУ:
«Нікога не было, ніхто не выявіў жадання ўзяць удзел. З боку экалогіі ніякіх пытанняў, там будуць нейкія сістэмы закрытага тыпу, нічога ніякаму возеру не пагражае».
Гэта не першы праект беларуска-дацкай кампаніі «Белдан»: падобны свінакомплекс працуе ў Ляхавіцкім раёне, ідзе будаўніцтва чарговага ў Слонімскім. Ляхавіцкае прадпрыемства – адно з лідараў у галіне, перадавыя тэхналогіі інвестыцыйнага праекту нахвальваў і Лукашэнка.
Жыхары задумваюцца, ці не дзякуючы гэтаму ўсе экалагічныя экспертызы кампанія прайшла з такой лёгкасцю.
ЯЎГЕН, МЯСЦОВЫ ЖЫХАР:
«Якая там была экспертыза? І што зрабілі, каб наш гэты вадаём быў чыстым?»
Між тым комплекс амаль пабудаваны, і чакаць выбуху незадаволенасці ў паселішчы і нейкіх зменаў праекту не варта. Маўляў, хоць ля самых дамоў будуй гэтую ферму – будзе ціха.
«Настолькі людзі прызвычаіліся, што з імі ніхто не лічыцца».
Таццяна Рэут, belsat.eu