«Радыё Свабода» піша, што ўвечары ў менскай інфекцыйнай лякарні памёр 69-гадовы былы працаўнік Нацыянальнага банку Юры Осіпаў. У мужчыны была пнеўманія, выкліканая вірусам COVID-19. З аналагічным дыягназам у шпіталі знаходзіцца ягоная жонка і дачка.
Дачка Юрыя Осіпава Ганна распавяла РС, што бацька захварэў два тыдні таму. Доктар спачатку дыягнаставаў звычайны ларынгіт і выпісаў таблеткі, але Осіпаву лепш не станавілася. У жонкі і дачкі таксама з’явіліся падобныя сімптомы.
У канцы тыдня стала зразумела, што ва ўсіх у сям’і пнеўманія. Паклалі спачатку ў 10-ю лякарню, а калі ўсё ж зрабілі тэсты на каронавірус і вынік аказаўся станоўчы, перавялі ў інфекцыйную. У Юрыя Осіпава ўжо была вельмі нізкая сатурацыя (насычанасць крыві кіслародам) – толькі 83%, патрэбны быў апарат штучнай вентыляцыі лёгкіх.
«Мы з маці ляжым у адной двухмеснай палаце, бацька – у іншай. Учора пазванілі з міліцыі, сказалі, што бацькі больш няма. Як хаваць – не ўяўляю, мы з мамай у цяжкім стане, станоўчай дынамікі няма, пагадзіліся на эксперыментальнае лячэнне прэпаратамі, якімі лечаць малярыю. Добра, што ў бацькі шмат сяброў, пахаваннем яны будуць займацца», – апавядае Ганна.
Міністэрства аховы здароўя афіцыйна пацвердзіла смерць 5 пацыентаў з каронавірусам па стане на 4 красавіка. Іх імёны не называліся.
Паводле інфармацыі СМІ, у Беларусі раней памерлі ад 6 да 8 чалавек з каронавіруснай інфекцыяй. Імёны сямі з іх вядомыя:
- 30 сакавіка ў Віцебску памерлі 75-гадовы Віктар Дашкевіч і 73-гадовая Аляксандра Чэпік;
- 1 красавіка памерлі 70-гадовая настаўніца з Копыльскага раёну Наталля Арлова і 67-гадовая жыхарка Менску Вольга Дзеравянка;
- 2 красавіка ў Віцебск памёр 70-гадовы пенсіянер Уладзімір Сідараў, а ў Менску – 60-гадовы Сяргей Говар.
- 3 красавіка ў Віцебску памерла 47-гадовая медсястра Святлана Кісялёва.
ІІ belsat.eu
