12 лістапада ў Беларусі стала 96-м днём з пачатку паслявыбарных рэпрэсіяў у краіне.
Смерць Рамана Банадарэнкі
З самай раніцы ўся краіна сачыла за лёсам 31-гадовага менчука Рамана Бандарэнкі – жыхара плошчы Перамен, які быў затрыманы і збіты напярэдадні ўвечары. З Цэнтральнага РУУС яго даставілі ў больніцу хуткай медычнай дапамогі ў цяжкім стане. Цуду не здарылася – увечары Раман памёр.
Паводле МУС, мужчына быў збіты ў выніку дваровага канфлікту. Але сваякі і жыхары двара заяўляюць, што яго затрымалі сілавікі ў цывільным, калі ён паспрабаваў абараніць бел-чырвона-белыя стужкі.
Даведыўшыся пра смерць Рамана Бандарэнкі, людзі сталі масава сцякацца да плошчы Перамен. Таксама акцыі салідарнасці праходзяць у іншых раёнах Менску і ў рэгіёнах краіны. Прынамсі сотні людзі выставілі знічкі на свае вокны.
На заўтра, 13 лістапада, у Беларусі абвешчаная неафіцыйная жалоба. Хвіліны маўчання і царкоўнага перазвону запланаваныя а 12:00. А 18:30 у менскім архікатэдральным касцёле адбудзецца імша за загінулага Рамана Бандарэнку. У гарадзенскім кафедральным праваслаўным сабору паніхіду будуць служыць а 10:15.
Масавыя затрыманні
Раніца таксама пачалася са спецаперацыя ў менскім жылым комплексе «Каскад». Сюды прыехалі сілавікі, якія знялі павешаныя паміж дамамі бел-чырвона-белыя майткі, а таксама ўламіліся ў кватэры некаторых жыхароў.
Апроч таго, паведамляецца пра затрыманні ўніверсітэцкіх актывістаў і ператрусаў у іх кватэрах. Сярод затрыманых – выкладчыца БДУІР Вольга Філатчанкава, студэнтка БДПУ Кася Будзько, прэс-сакратарка Задзіночання беларускіх студэнтаў і валанцёрка «Вясны» Ксенія Сырамалот, чалец Каардынацыйнай рады і прадстаўніца Святланы Ціханоўскай у пытаннях моладзі Алана Гебрэмарыям ды іншыя.
У пасёлку пад Асіповічамі быў затрыманы і моцна збіты актывіст анархісцкага руху Мікола Дзядок.
Таксама па ўсёй Беларусі праходзілі суды над актывістамі. Напрыклад, у Менску асудзілі 21-гадовую Марыю Сафонаву на два месяцы арышту за два надпісы.
Акцыі інвалідаў і жанчынаў
Сёння таксама мусіў прайсці Марш людзей з інваліднасцю, але сілавікі не далі ім выйсці з плошчы Незалежнасці. У выніку людзі схаваліся ў Чырвоным касцёле.
Між тым па шэрагу вуліцы прайшліся шэсцем жанчыны з бел-чырвона-белымі парасонамі. Іх ніхто не затрымліваў.
МГ belsat.eu
