Тымтэатр, вядомы сваімі інклюзіўнымі спектаклямі, інтэграванымі ў тым ліку для дзяцей і дарослых з абмежаванымі магчымасцямі, паведаміў пра выгнанне з дому. Што адбылося і як з гэтым справіцца – Belsat.eu запытаўся ў заснавальніка тэатру Андрэя Бардухаева-Арла.
– Высяленне было для нас абсалютна нечаканым, – кажа Андрэй. – Мы літаральна за 5 дзён да гэтага абмяркоўвалі планы, інклюзіўны баль, які меў адбыцца напрыканцы кастрычніка, навагоднія казкі. Але кіраўніцтва ДК «Беліцкага» нічога не вырашала – вырашаў аддзел ідэалогіі Гомельскага гарвыканкаму.
Як прычына нам было названа тое, што былі публікацыі ў сацыяльных сетках ад імя непасрэдна тэатру: пост «як паводзіць сябе на мітынгу», шэраг пастоў у падтрымку купалаўцаў. Відаць, людзі, якія не згодныя з ідэалагічным кірункам дзяржавы не маюць права карыстацца «дабротамі», якія гэтая дзяржава дае.
Інклюзіўны баль
Чатыры гады таму «Тым» ужо губляў памяшканне, таму навіна пра высяленне не надта спужала трупу тэатру, але зараз праца тэатрау ўсё ж фактычна паралізаваная. Але «Тым» не губляе аптымізму і шукае шляхі для вырашэння сітуацыі. Тым больш, што пад пагрозай апынуўся традыцыйны ўжо інклюзіўны баль інтэграваны для людзей з асаблівымі патрэбамі. Такія балі «Тым» арганізоўвае ўжо трэці год запар і людзі прыязджаюць туды з усёй краіны.
– Гэтае высяленне кардынальна паўплывала на нашую працу, бо мы дужа прывязаныя да нашай пляцоўкі, – тлумачыць Арол-Бардухаеў. – Большасць дэкарацыяў разлічаная і падагнаная менавіта пад гэтае памяшканне На дадзены момант мы не зусім у шоку, бо ў пэўным сэнсе ўжо перажылі гэта і шукаем шляхі вырашэння праблемы. Акрамя таго, што ў нас ёсць тэатр – мы маем яшчэ і фонд «Разам тут» (фонд «Разам тут», заснаваны ідэйнымі кіраўнікамі тэатру «Тым», накіраваны на стварэнне безбар’ернага асяроддзя: прасторы дзейнасці, якая абʼядноўвае людзей з падвышанымі патрэбамі – заўв. рэд.). І зараз на першым месцы для нас стаіць інклюзіўны баль, які адбудзецца, але іншай пляцоўцы 31 кастрычніка.
Перазагрузка
Па словах Андрэя Арол-Бардухаева тэатр вырашыў не губляць часу дарма і скарыстаць яго на пэўную творчую перазагрузку, пакуль «Тым» шукае новае памяшканне. Зараз жа неабыякавыя гомельцы далі тэатру памяшканне для захоўвання рэквізіту.
– Гэта вельмі шмат значыць для нас, бо за чатыры гады працы тэатру мы падрыхтавалі шмат спектакляў, да кожнага з якіх ёсць свае дэкарацыі, касцюмы, рэквізіт, – дзеліцца думкамі Арол-Бардухаеў. – Наагул падтрымку мы адчуваем каласальную. Але самае важнае, што мы не атрымалі ад сваёй публікі ніводнага каментара, ніводнага слова пра тое, што мы нешта робім не так. Я рады за тое, што людзі, якія хоць неяк дакрануліся на нашага тэатру, нашай творчасці – яны бачаць і разумеюць чым мы на самой справе займаемся. Нас можна сагнуць, але мы ўсё адно выберамся, зламаць нас немагчыма, бо гэта адзін у полі не ваяр, а нас 97 %.
Як падтрымаць «Тым»
– Нам далі зразумець, што нас падтрымлівае дужа шмат людзей. Таму на сённяшні момант я практычна не турбуюся за нашую будучыню і пэўны, што ўсё вырашыцца добра, – кажа Андрэй Арол-Бардухаеў. – Зараз для нас самае важнае – гэта пляцоўка, бо рэпетаваць мы цяпер не можам. Але калі казаць яшчэ больш канкрэтна, то зараздля нас зараз самая важная задача – правесці інклюзіўны баль. І тут дапамагчы можа абсалютна любы ахвочы. У нас ёсць дабрачынны рахунак, на які людзі пераводзяць сродкі. І старонка, куды можна напісаць у справе дапамогі з памяшканнем.
МД Belsat.eu
