Звычайна фэсты хваляцца колькасцю сусветных кінапрэмʼераў, а таксама велічынёй кінарынку. Арганізатары 26-га Менскага міжнароднага кінафестывалю «Лістапад» Анжаліка Крашэўская і Ігар Сукманаў распавялі пра прэм’еры, якія ўжо неўзабаве адбудуцца ў Менску, а таксама падзяліліся звесткамі пра бюджэт імпрэзы.
Сяргей Філімонаў. Колькі сусветных прэмʼераў на «Лістападзе-2019»?
Ігар Сукманаў. На такія прэмʼеры мы не робім акцэнту. Так, ёсць шмат свежых замежных карцінаў, але ўласна «сусветныя прэмʼеры» ёсць толькі ў спісе Нацыянальнага конкурсу… Адзін з фільмаў гэтага конкурсу з назвай «1986» выклікаў спрэчкі ў назіральнікаў, бо яго знялі нямецкія кінематаграфісты. Праўда, з удзелам беларусаў.
СФ. Ці існуе на Менскім фестывалі кінарынак?
Анжаліка Крашэўская. Яшчэ не, гэта для арганізатараў толькі мара. Бо беларусам пакуль няма чым гандляваць. Хоць разнастайныя сумесныя з кінематаграфістамі з розных краін праекты выклікаюць надзею на лепшую будучыню.
СФ. Якія выдаткі нясуць арганізатары, бо запланавана паказаць каля 150 фільмаў з паўсотні краін свету?
Агульная валавая сума выдаткаў, практычна ўсё, нават тое, што зрабілі бясплатна, каля 450 тысяч долараў, – падкрэсліла Анжаліка Крашэўская, дырэктарка фестывалю. – Напрыклад, на фестывалі ў Карлавых Варах бюджэт перавышае 2,5 мільёна еўраў. У «Лістапада» вельмі сціплая сума, таму даводзіцца эканоміць на кожным кроку.
Праграмны дырэктар «Лістападу» Ігар Сукманаў слушна дадаў: «У нас была магчымасць запрасіць, напрыклад, Жульет Бінош, але за гэтыя грошы мы маглі прывезці 20 невялікіх творчых груп з розных краін з іх экзатычнымі або незвычайнымі фільмамі. Натуральна, мы абралі другое. Бо калі хочаш стварыць фестывальную атмасферу за невялікі бюджэт варта адмовіцца ад яскравых зорак».
У параўнанні са старымі часамі «Лістапад» моцна вырас. Акрамя конкурсных праграм ігравога, нацыянальнага і дакументальнага кіно, абяцаюць «спецпаказы» і розныя пазаконкурсныя праграмы «па інтарэсах». Тут можна будзе ўбачыць вялікую колькасць фільмаў з еўрапейскіх краін. Такіх, якія наўрад ці калі-небудзь патрапяць у кінапракат, і не будуць запампаваныя ў інтэрнэт.
Па чутках, у 2018 годзе экс-намесніца міністра культуры Ірына Дрыга, ультыматыўна загадала прыбраць з фестывалю некалькі фільмаў. У тым ліку карціну Андрэя Куцілы «Стрыптыз і вайна» аб рэальным стрыптызёры, які палемізуе пра жыццё і пра самавыяўленне са сваяком ветэранам вайны. Або фільм «Мая бабуля з Марса» Аляксандра Міхалковіча, трагікамедыю пра жыццё ў сучасным акупаваным Расеяй Крыме. Разгарэўся скандал. Некалькі ўдзельнікаў у знак пратэсту знялі свае фільмы з паказаў.
У гэтым годзе падобных спрэчак паміж Міністэрствам культуры і Арганізатарамі фестывалю няма. Ці мы пра іх не ведаем нічога. Склад міністэрскіх чыноўнікаў, якія адказваюць за кіно, практычна цалкам змяніўся. Больш за тое, забароненыя ў мінулым годзе фільмы цяпер пакажуць гледачам! А Андрэяй Куціла ў конкурснай праграме дакументальных фільмаў прэзентуе сваю новую стужку «Summa» (фільм зроблены пры падтрыманні тэлеканалу «Белсат») аб сяброўстве старога польскага мастака і юнай беларускай мастачкі.
Першы Менскі міжнародны кінафестываль «Лістапад» прайшоў у 1994 годзе. Сёлета фестываль стартуе 1-га і завершыцца 8-га лістапада.
Сяргей Філімонаў belsat.eu
Рэдакцыя можа не падзяляць меркавання аўтара.