Следчым упраўленнем УСК па Гомельскай вобласці 2 лістапада была распачата крымінальная справа па ч. 1 арт. 342 (арганізацыя і падрыхтоўка дзеянняў, што груба парушаюць грамадскі парадак, або актыўны ўдзел у іх) Крымінальнага кодэкса ў дачыненні чацвярых работнікаў ААТ «БМЗ – кіроўная кампанія холдынгу «БМК».
Пра гэта паведамляецца ў прэс-рэлізе Следчага камітэту.
Падставай для крымінальнага пераследу стаў жнівеньскі страйк на заводзе.
«Паводле следства, 17 жніўня гэтага года на тэрыторыі прадпрыемства група агрэсіўна настроеных грамадзянаў з ліку работнікаў прадпрыемства і іншых асобаў спыніла рух тэхналагічнага транспарту, які ажыццяўляў дастаўку сыравіны ў сталеплавільныя цэха, што прывяло да парушэння працы заводу і прычыненні шкоды», – кажуць у СК.
Для расследавання страйку на БМЗ створана следчая група. Як адзначаюць у СК, у ходзе даследчай праверкі былі апытаныя звыш за 100 грамадзянаў, агледжаны запісы відэакамер на тэрыторыі прадпрыемства, а таксама відэазапісы, размешчаныя ў сетцы Інтэрнэт.
Паводле СК, следства ўжо знайшло «арганізатараў і актыўных удзельнікаў несанкцыянаванага мерапрыемства, у дзеяннях якіх маюцца прыкметы складу злачынства».
СК таксама апублікавала відэа, дзе адзін з фігурантаў справы кажа, што шкадуе, што ўдзельнічаў у пратэстах.
ІІ belsat.eu
