У Вушацкім раёне, што на Віцебшчыне, імкліва расце колькасць хворых на каронавірусную інфекцыю ды на пнеўманію. Пра гэта ў размове з belsat.eu распавяла працаўніца мясцовай хуткай дапамогі Таццяна Андрэева.
Таццяна Андрэева адзначыла, што па стане на 2 траўня ў раённай больніцы ляжала 18 чалавек са станоўчым каронавірусам, а 75 – з неўдакладненай віруснай пнеўманіяй. Агулам, паводле яе, ва Вушацкім раёне было каля 40 чалавек з станоўчым каронавірусам.
«Кантакты першага ўзроўню не лічаць. Але яны ўсе ізаляваныя», – распавяла медык.
Нагадаем, што, згодна з Белстатам, у раёне на 1 студзеня 2020 года жыло 12,7 тыс. чалавек, з іх 5,8 тыс. – у саміх Вушачах.
Пры гэтым Таццяна адзначыла, што «ўсё пад кантролем» – спецвопраткай і растворамі медыкі забяспечаныя.
«Але сітуацыя, канечне, не такая, як па тэлевізары кажуць. Колькасць [хворых на каронавірус. – Рэд. Belsat.eu] расце ў геаметрычнай прагрэсіі. Калі на пачатку красавіка ў нас было 2 чалавекі, то цяпер іх ужо 40. За месяц. І гэта вельмі шмат. Бо людзей з іншай паталогіяй класці зусім няма куды – у больніцы няма месцаў», – распавяла суразмоўца.
Што датычыць дзеянняў уладаў, то суботнік 25 красавіка ў раёне адмянілі, але з заробкаў людзей грошы вылічылі, у тым ліку і медыкаў. У царкве службы праходзяць на вуліцы, а іншых масавых падзеяў «па жыцці» было няшмат, адзначыла медык.
Таццяна падкрэсліла, што праз гэта людзі з хранічнымі захворваннямі «проста ў шоку».
«Ім трэба планава праходзіць нейкія працэдуры, кропельніцы, а класці няма куды. Выпісваюць, прычым недалечаных. Гэтак, кіроўцу нашага з хуткай выпісалі недалечанага. Ён зараз удома, ляжаў у палаце з двума станоўчымі пацыентамі. Да таго моманту, калі прыйшлі вынікі іх аналізу і выявілася, што яны станоўчыя, усіх хуценька выпісалі дадому на ізаляцыю. А палату заклалі іншымі пацыентамі, якім таксама патрэбныя ўколы, лячэнне. Дзесяць дзён паляжаў – і да пабачэння. Далей ты будзеш ляжаць удома, і ці ачуняеш, не ачуняеш – твае праблемы», – кажа медык.
Людзі на самаізаляцыі даюць падпіску нікуды не хадзіць, ні з кім не кантактаваць. Пасля іх штодня па хатнім тэлефоне ці па дамафоне абтэлефаноўваюць з праверкай міліцыянты.
Хварэюць на каронавірус і самыя медыкі. Гэтак, з пачатку сакавіка чатыры фельчара хуткай ляжалі ў аддзяленні з пнеўманіямі. Ляжаць з пнеўманіямі і працаўнікі дзіцячага аддзялення, хоць ва ўсіх адмоўны аналіз на COVID-19, кажа суразмоўца.
«Медпрацаўнікоў шмат хварэе. У нас рэнтген-лабарантка захварэла. Хоць мы ўсе ў спецвопратцы ходзім, выконваем усе неабходныя санітарныя нормы, але, пэўна, гэтага не дастаткова пры такой плыні людзей. Я прыходзіла ў ноч. Стаіць рэнтген-лабарантка, у яе тахікардыя, яна ўся белая і кажа: «Сёння ў нас было 265 здымкаў». А яна працуе адна. І ўсім рабіла флюараграфію. Кажа, што праз аднаго пнеўманія. Кагосьці паклалі, кагосьці дадому паслалі. Сітуацыя ў нас, канечне, сумная», – падкрэсліла Таццяна.
Пры гэтым, паводле яе, не ўсім хворым выпісваюць бальнічныя.
«У кіроўцы [хуткай, які захварэў. – Рэд. Belsat.eu], напрыклад, жонцы нават бальнічны не далі, хоць яна і кантактная, і ў яе «клініка»: тэмпература, яна сябе кепска адчувае. У яе і аналізаў не бралі – проста ўдома сядзіць за свой кошт», – заявіла суразмоўца.
Яна дадала, што галоўнае, што пужае ў каронавірусе, гэта тое, што незразумела, як ён дзейнічае.
«Я не магу зразумець, як працуе гэты вірус. Як ім людзі заражаюцца, як гэта будзе праходзіць і калі гэта ўсё скончыцца, я не ведаю. І гэта пужае. Звычайна, як пачнецца што-небудзь, у галаве лагічна ўсё выбудоўваецца і ўсё зразумела, а тут зусім нічога не зразумела», – падкрэсліла Таццяна Андрэева.
Афіцыйных звестак адносна сітуацыі ў раёне атрымаць не атрымалася. Кіраўнік Вушацкага раённага цэнтру гігіены ды эпідэміялогіі адзначыў, што не можа даць каментар, бо спяшаецца на селектарную нараду з галоўным лекарам Віцебскай вобласці.
МГ belsat.eu