Паводле інфармацыі праваабаронцаў, толькі ў жніўні за ўдзел у мірных акцыях пратэсту было затрымана больш за 7 500 чалавек. Мы спыталі праваабаронцу Алега Волчака, як родным даведацца пра лёс і месцазнаходжанне затрыманых.
У адпаведнасці з законам «Аб органах унутраных справаў», неабходна звярнуцца ў міліцыю па месцы рэгістрацыі зніклага чалавека, падаць заяву, прыкласці фатаграфію і апісаць абставіны.
Як доўга разглядаецца заява?
Міліцыя павінна на працягу дня паведаміць: ці яго знайшлі, ці ён знаходзіцца ў Цэнтры ізаляцыі правапарушальнікаў, або яго адпусцілі.
Які тэрмін маюць права трымаць чалавека ў міліцыі?
Для высвятлення абставінаў або высвятлення асобы – да 3-х гадзін.
Па заканчэнні трох гадзін, супрацоўнікі міліцыі могуць прад’явіць яму адміністрацыйны пратакол, дзе будзе паказана, што ён здзейсніў, і на працягу 72 гадзін яго справу павінны накіраваць у суд, а да суда ён будзе знаходзіцца ў ЦІП.
Якія правы мае падазраваны ў здзяйсненні адміністрацыйнага правапарушэння?
- мець абаронцу;
- паведаміць супрацоўніка міліцыі, каб яны дазволілі зрабіць яму званок сваякам, што яго затрымалі;
- маюць права далучыць усе доказы, якія ў іх ёсць, пра нявіннасць;
- напісаць скаргу пракурору на неабгрунтаванасць затрымання.
Ці ёсць магчымасць перадаць адміністратыўна затрыманаму перадачу?
У кожным ЦІП маюцца свае ўнутраныя правілы. Блізкія сваякі маюць права, да прыкладу, у цэнтры на Акрэсціна, перадаць перадачу сваім сваякам, раз у тры дні, вагой да 5 кг. [на момант публікацыі, перадачы ў ЦІП на Акрэсціна можна перадаваць толькі па чацвяргах – заўв. рэд.].
Што можна перадаваць?
- тапачкі;
- спартыўны касцюм;
- ніжнюю бялізну;
сродкі асабістай гігіены; - сала;
- вэнджаную каўбасу;
- цукеркі;
- арэхі;
- шакалад;
- хлеб;
- ваду.
А што нельга перадаваць?
Гатовыя стравы, кісламалочныя прадукты ці прадукты, якія патрабуюць тэрмічнай апрацоўкі.
Што рабіць, калі чалавек, які адбывае адміністрацыйны арышт, мае захворванні і яму трэба прымаць лекі?
Блізкія сваякі маюць права напісаць і перадаць заяву на імя начальніка ЦІП, каб перадаць неабходныя лекі. Не выключана, што ў выпадку небяспечнага захворвання ён можа быць пераведзены ў асобную камеру або вызвалены.
Праваабарончую праграму «Маю права» глядзіце кожную пятніцу а 19:05 на тэлеканале «Белсат» праз спадарожнік «Астра 4A» (ранейшая назва «Sirius 4»), онлайн, на YouTube-канале «Белсат Life» або ў закладцы «Праграмы» на нашай старонцы.
/ІР
