Грамадскі Балонскі камітэт 5 лютага прэзентаваў у «Press Club Belarus» комплекснае даследаванне «Белая кніга 2018. Еўрапейскія перспектывы беларускай вышэйшай адукацыі». Эксперты распавялі, з якімі выклікамі сутыкнулася беларуская сістэма адукацыі пасля ўступлення ў Балонскі працэс і якіх зменаў патрабуе ў найбліжэйшым часе.
З 2011 года грамадскі Балонскі камітэт аналізуе беларускую адукацыйную палітыку. Гэтая працоўная група прапанавала ўнесці папраўкі ў Кодэкс аб адукацыі, якія дазволілі б Беларусі не толькі зняць прэтэнзіі да стану акадэмічнай свабоды, універсітэцкай аўтаноміі і самакіравання ВНУ, але і заняць асноўную пазіцыю ў сферы адукацыі сярод еўрапейскіх краінаў.
У 2015 годзе Беларусь афіцыйна далучылася да Балонскага працэсу, аднак рэформы ідуць марудна і не маюць інавацыйнага характару.
На мінулым тыдні Аляксандр Лукашэнка заявіў, што беларуская адукацыя ў рэформах не мае патрэбы.
«Рэформамі мы ніколі не займаліся ў адукацыі і займацца не будзем. Мы павінны ўдасканальваць тое, што маем сёння, і тое, што атрымалі ўчора. Ламаць нічога нельга», – сказаў ён.
Тым часам эксперты, што ўваходзяць у грамадскі Балонскі камітэт мяркуюць: калі рэформы і далей зацягваць, не зважаюючы на відавочныя дэфармацыі і дысбалансы сістэмы, неўзабаве беларуская адукацыя стане абсалютна бескарыснай рэччу.
З 2014 года колькасць студэнтаў скарацілася на 36%. Пры гэтым на 40% скарацілася доля студэнтаў-выпускнікоў сельскіх школаў.
Што датычыць людзей з інваліднасцю сярод навучэнцаў ВНУ -іх стала на 23% меней.
Паводле дадзеных Белстату, у 2014 годзе ў Беларусі ў ВНУ навучаліся больш за 362 тысячы чалавек. Сёлета гэтая лічба апусцілася да 268 тысяч, а колькасць установаў скарацілася з 54 да 51.
Моцна скараціліся выдаткі бюджэту на вышэйшую адукацыю.
«Выдаткі на аднаго студэнта за апошнія пяць гадоў знізіліся на 25%, а на фінансаванне вышэйшай адукацыі ў цэлым – на 44%», – распавядае сябар грамадскага Балонскага камітэту, была прарэктар ЕГУ Уладзімір Дунаеў.
Паводле словаў Дунаева, існуюць тры крытэры ацэнкі эфектыўнасці адукацыйнай сістэмы: дасяжнасць, выдаткі і якасць. Цяпер адзначаецца пагаршэнне сітуацыі па ўсіх трох пунктах.
Якасць адукацыі ацаніць даволі складана, адзначае эксперт, бо не існуе адзінага крытэра яе вызначэння.
«Ацэнкі на іспытах далёка не заўсёды адлюстроўваюць рэальны стан рэчаў. З такой тэндэнцыяй скарачэння выдаткаў на адукацыю, ні пра які рост яе якасці казаць не даводзіцца. Калі праблемы з якасцю былі пяць гадоў таму, то сёння, калі грошай на адукацыю сталі выдаткощваць яшчэ менш, яны толькі пагоршыліся», – кажа Дунаеў.
Зніжэнне якасці адукацыі ўскосна пацвярджае і той факт, што з 2000 па 2017 гады доля беспрацоўных сярод выпускникощ ВНУ павяличылася ў два разы. Маючы дыплом са спецыяльнасцю, попыт на якую адсутнічае а рынку працы, людзі папросту не змаглі ўладкавацца.
Паводле словаў загадчыка кафедры БДТУ, кандыдата фізіка-матэматычных навук Сяргея Вятохіна, матывацыя студэнтаў «ніжэй за плінтус», бо з іх зрабілі незапатрабаваных спецыялістаў.
«Яны паступаюць у ВНУ дзеля дыплома, а не дзеля ведаў. Але працадаўцу не цікавы іхны дыплом, яму патрэбныя кампетэнцыі», – сцвярджае эксперт.
Далучыўшыся да Балонскага працэсу, Беларусь абавязалася стварыць незалежнае агенцтва, якое ацэньвала б задаволенасць працадаўцаў узроўнем падрыхтоўкі выпускніка. Такое агенцтва забяспечыла б зваротную сувязь паміж ВНУ і рэкрутэрам. У выніку гэты пункт Беларусь выканала фармальна, даручыўшы функцыю не незалежнай структуры, а дзяржаўнаму Дэпартаменту кантролю якасці адукацыі, які ўваходзіць у Мінадукацыі.
То бок, дзяржава прадказальна манапалізавала права ацэньваць якасць акадэмічнай падрыхтоўкі.
Для Еўрапейскай прасторы вышэйшай адукацыі (ЕПВА) акадэмічная свабода і сумленнасць, інстытуцыйная аўтаномія і ўдзел студэнтаў у кіраванні ўніверсітэтамі, адказнасць грамадства за вышэйшую адукацыю і адказнасць ВНУ перад грамадствам з’яўляюцца базавымі каштоўнасцямі.
«Аднак у Беларусі працягваюцца акадэмічныя рэпрэсіі і заканадаўчае абмежаванне акадэмічнай свабоды. Нізкі ўзровень аўтаноміі беларускіх ўнівэрсітэтаў і недэмакратычныя метады кіравання здольныя абясцэніць магчымы будучы прагрэс у імплементацыі Балонскіх інструментаў», – сцвярджаюць эксперты.
На думку аўтараў «Белай кнігі 2018», прыняць правільныя рашэнні беларускім уладаў перашкаджае падазронасць у дачыненні да еўрапейскіх акадэмічных імператываў і страх страты кантролю над грамадствам у цэлым.
***
Сябры грамадскага Балонскага камітэту рэзюмуюць: Беларусь зацягнула рэформы, якія неабходна было правесці яшчэ 20 гадоў таму. Хаця эксперты і прызнаюць, што выкананне абавязкаў у межах балонскага працэсу не азначае аўтаматычнае вырашэнне праблемаў. Калі мець на мэце працяглы станоўчы эфект, рэформы мусяць быць не шокавымі, а паслядоўyымі і комплекснымі.
КА, belsat.eu