Увечары 16 чэрвеня, на некалькі дзён пазней вызначанага законам тэрміну, суд Маскоўскага раёну Менску разгледзеў скаргі Святланы Купрэевай і ейнага адваката на затрыманне. Пасяджэнне суда праходзіла ў закрытым рэжыме, аднак вядома, што абедзве скаргі былі адхіленыя, паведамляе TUT.by
Абарона настойвае на адсутнасці падставаў для затрымання Купрэевай, таму пастанова суда Маскоўскага раёна будзе таксама абскарджана ў вышэйшай інстанцыі. Звестак аб выстаўленні Купрэевай абвінавачвання няма, яна застаецца ў СІЗА КДБ у статусе падазраванай.
«Пастанова аб ужыванні меры стрымання ў выглядзе заключэння пад варту атрымана абаронай толькі ўвечары 15 чэрвеня. Ужо 16 чэрвеня адвакатам пададзеная скарга ў суд на меру стрымання. Гэтая скарга яшчэ не разгледжаная.
Дачыненне Купрэевай да якіх-небудзь супрацьзаконных дзеянняў выклікае вялікія сумневы, паколькі яна не працавала ні ў Белгазпрамбанку, ні ў адной з фірмаў, дзе праходзілі ператрусы. Яна толькі з’яўляецца сяброўкай Віктара Бабарыкі. Грамадскасць звязвае пераслед Купрэевай з тым, што яна была ў ініцыятыўнай групе Бабарыкі», – заяўляюць у штабе патэнцыйнага кандыдата.
Пасля таго, як адваката не пускалі да Купрэевай некалькі дзён для аказання ёй юрыдычнай дапамогі, была пададзеная скарга ў Генеральную пракуратуру.
«Штаб Віктара Бабарыкі патрабуе спыніць беспадстаўны пераслед сваіх прыхільнікаў», – заяўляе каманда прэтэндэнта ў прэзідэнты.
11 чэрвеня раніцай працаўнікі ДФР забралі з дому і павезлі ў СІЗА КДБ сяброўку сямʼі Віктара Бабарыкі і чальца ягонай ініцыятыўнай групы, каардынатара па адным з раёнаў Менску Святлану Купрэеву. Яна не мела дачынення да працы ні ў адной фірме, звязанай з «Белгазпрамбанкам», з Бабарыкам у іх былі не дзелавыя, а выключна сяброўскія стасункі.
КА belsat.eu