Урад Шры-Ланкі рыхтуе план аднаўлення смяротнага пакарання за злачынствы, звязаныя з наркотыкамі. Пра гэта заявіў прэзідэнт краіны Майтрыпала Сірысена, паведамляе adaderana.lk.
Паводле яго, ён ужо падпісаў смяротнае пакаранне на чацвярых асуджаных, яно будзе выкананае ў найбліжэйшы час.
Смяротнае пакаранне дазволенае заканадаўствам Шры-Ланкі, але не ўжываецца апошнія 43 гады. Найвышэйшай мерай пакарання зараз з’яўляецца пажыццёвае зняволенне.
З крытыкай аднаўлення смяротнага пакарання ўжо выступілі праваабаронцы з Amnesty International, якія былі «шакаваныя» заявамі прэзідэнта Шры-Ланкі.
Праваабаронцы таксама адзначаюць адсутнасць інфармацыі, якая не дазваляе зразумець, ці вычарпалі асуджаныя юрыдычныя механізмы для аспрэчвання прысуду і ці ведаюць іх сваякі пра магчымае пакаранне іх смерцю.
МГ belsat.eu