Міністэрства адукацыі думае над тым, каб атэставаць дзяцей на падставе адзнакаў за тры чвэрці. Пра гэта ў эфіры тэлеканалу «Беларусь 1» заявіў намеснік кіраўніка ведамства Аляксандр Кадлубай.
«Я не выключаю тое, што бацькі, як яны выказваюцца ў каментарах, палічаць, што здароўе іх дзяцей першаснае… У такім выпадку дзеці будуць атэставаныя па выніках тых адзнак, якія яны атрымалі ў 3 чвэрцях. Гэта дазваляюць правілы атэстацыі», – адзначыў Аляксандр Кадлубай.
Пры гэтым пакуль незразумела, ці будуць ставіць «н» у часопісе наведвальнасці, як ацэньваць веды пры вочным і завочным навучанні. Адпаведны дакумент плануецца прыняць у бліжэйшыя два дні.
Пры гэтым афіцыйна дыстанцыйнага навучання не будзе, але можна казаць аб навучанні з ужываннем інфармацыйна-камунікацыйных тэхналогіяў паводле індывідуальнага вучэбнага плану.
Таксама Міністэрства адукацыі ў сваім тэлеграм-канале паведаміла пра тое, што трэці этап рэпетыцыйнага тэставання падоўжаны да 24 траўня.
Зроблена гэта для таго, каб задаволіць попыт абітурыентаў на рэпетыцыйнае тэставанне і каб пры гэтым ля пунктаў іх правядзення была магчымасць аператыўна рэагаваць на сітуацыю і забяспечыць усе неабходныя рэкамендацыі.
МГ belsat.eu