Серыял «Гульня тронаў» скончыўся, фанаты – абураныя


У Менску на пляцоўцы «Пясочніца» адбыўся паказ фінальнай серыі культавага серыялу «Гульня тронаў». Арганізатары не памыліліся, і стаўка на прагляд апошняга сезону спрацавала: месцаў усім ахвотным не хапіла, людзі неслі свае складныя крэслы і перацягвалі паддоны ад фуд-кортаў бліжэй да экрану.

Сумесны прагляд апошняй серыі «Гульні тронаў» наведалі і карэспандэнты «Белсату», каб пачуць з першых вуснаў уражанні фанатаў серыялу.

Вольга прыйшла глядзець серыял разам з сабачкам.
Фота: Ірына Арахоўская / belsat.eu

«Супярэчлівыя эмоцыі. Спадабалася, што серыял нарэшце скончыўся. Але 8-ы сезон быў зліты, я нават падпісвала петыцыю, каб яго перазнялі. Я разумею, што гэта наўрад ці адбудзецца, але выразіць сваю грамадзянскую пазіцыю трэба, бо стала крыўдна за свой любімы серыял. Карцінка была прыгожая, але без логікі», – кажа Вольга, якая прыйшла на агульны прагляд разам з сабачкам.

Фанатка таксама кажа, што не можа вылучыць з серыялу добрых ці злых персанажаў, бо яны ўсе выклікаюць супярэчлівыя эмоцыі.

Настасся думала, што серыял скончыцца па-іншаму.
Фота: Ірына Арахоўская / belsat.eu

«Я думала, што ўсё па-іншаму скончыцца. І вельмі хочацца яшчэ, бо гэта вельмі круты серыял. Цікавы сюжэт, заблытаны, з нечаканымі паваротамі, ёсць над чым падумаць. На вышэйшым узроўні тут касцюмы і спецэфекты. Ведаю, што фанаты патрабуюць працягу і перазняць апошні сезон. Было б добра», – кажа Настасся.

Дарэчы, у інтэрнэце фанаты серыялу «Гульня тронаў» зараз падпісваюць петыцыю, каб апошні сезон серыялу быў перазняты. На абед аўторка было сабрана больш за 1,3 млн подпісаў!

Сяргей не зразумее, адкуль такі бум на серыял.
Фота: Ірына Арахоўская / belsat.eu

«А мне не спадабалася. Яны ў 3 і 4 серыі нагналі шмат усяго, і стала зразумелым, што ў 6-й будзе ўсё сумбурна. Па выніку мы нічога не атрымаем. То бок яны за 7 сезонаў далі шмат інфармацыі і за 6 серыяў апошняга сезону не атрымалася нічога патлумачыць. Не зразумела, адкуль такі бум на серыял. Папулярнасць, лічу, ён набыў пасля 5 сезону, але з якой прычыны – не ведаю, проста раптам усе яго пачалі глядзець», – кажа Сяргей.

Агульны прагляд серыялу «Гульня тронаў».
Фота: Ірына Арахоўская / belsat.eu

Кірыл, які таксама прыйшоў у «Пясочніцу» на агульны прагляд апошняй серыі «Гульні тронаў», кажа, што серыя была зацягнутая і выглядала не крывавай, як мінулая, а хутчэй больш дэмакратычнай. Ксенія пасля прагляду шостай серыі восьмага сезону таксама мае супярэчлівае стаўленне да таго, што пабачыла. Серыял пачаў дзівіць сюжэтнымі паваротамі з 6-га сезону, калі пайшлі разыходжанні з раманам.

Фота: Ірына Арахоўская / belsat.eu

«Тут мяне часам вельмі бамбіла. Сюжэт трымаецца на шматлікіх прароцтвах, а тут іх выкінулі ў смецце. Усё развіццё некаторых персанажаў пайшло кату пад хвост.

Але канец агулам парадаваў. Яшчэ Джордж Марцін абяцаў «горка-салодкі фінал» – і мы яго атрымалі. Вялікае зло пакаранае, добрыя – ва ўладзе. Але прасвету не бачна».

Амерыканскі тэлесерыял у жанры фэнтэзі заснаваны на рамане «Песнь Лёду і Агню» Джорджа Р. Р. Марціна. Першую серыю свет пабачыў 17 красавіка 2011 года, а апошняя выйшла сёлета 19 траўня. За гэты час ён быў адзначаны шматлікімі ўзнагародамі і нарабіў шмат шуму сярод крытыкаў за процьму ненарматыўнай лексікі, рэалістычных сцэнаў забойстваў і эротыкі.

Агульны прагляд серыялу «Гульня тронаў».
Фота: Ірына Арахоўская / belsat.eu

Марыя Арцыбашава, фота Ірына Арахоўская belsat.eu

Стужка навінаў