Украіны больш не будзе. Замест яе цяпер – Маларосія. Гэтак пастанавілі ў падкантрольнай Крамлю «Данецкай Народнай Рэспубліцы», якая ўжо пахавала праект «Наваросіі». Кіраўнік ДНР Аляксандр Захарчанка абвесціў сёння пра стварэнне новай дзяржавы замест Украіны.
Сталіца Маларосіі, на задуму Захарчанкі, будзе ў Данецку
Украіну сваім рашэннем сепаратысты папросту скасавалі. Улады самаабвешчанай суседкі ДНР – «Луганскай Народнай Рэспублікі» – ужо заявілі, што іх у новую дзяржаву не паклікалі. Але прымалі ўдзел тыя, хто спачувае ідэі Маларосіі, з рэгіёнаў Украіны.
У Маскве ідэі Захарчанкі здзівіліся
Нават у Крамлі, які курыруе сепаратыстаў. Але адначасова выказалі разуменне: маўляў, самаабвешчаныя рэспублікі гэтак даўно просяцца ў Расею, а іх не прымаюць.
Афіцыйны Кіеў у сваю чаргу заявіў, што праект «Наваросіі» пахаваны. Маларосія ж, на ідэю яе творцаў, пад сцягам Багдана Хмяльніцкага збіраецца браць курс на далучэнне да Саюзнай дзяржавы Расеі і Беларусі ды плануе як пераемніца Украіны захаваць бязвізавы рэжым з Еўразвязам. Народны трыбунал Маларосіі збіраецца судзіць усіх – ад Януковіча да Парашэнкі.
«Творчы геній нашага народа зможа вывесці Маларосію на перадавыя рубяжы сусветнай цывілізацыі, сказаць сваё слова ў гісторыі, слова дабра і праўды», – заявіў Захарчанка.
Навіна пра планы сепаратыстаў узарвала сацыяльныя сеткі
Маларосы, у адпаведнасці з Канстытуцыйным актам, зачытаным сёння ў Данецку, будуць гаварыць на маларасейскай і расейскай мовах. Тры гады ў новай краіне будзе дзеяць надзвычайнае становішча. Дакумент прадугледжвае таксама праваслаўныя духоўныя скрэпы, барацьбу з карупцыяй і аднаўленне Дня Перамогі 9-га траўня. Гісторыя ў Маларосіі будзе, мяркуючы з усяго, таксама альтэрнатыўная.
Незразумела, якія мэты стварэння новага праекту на Данбасе. Захарчанка мог бы з тым жа поспехам абвясціць стварэнне Маларосіі ў межах былой Рэчы Паспалітай ці Вялікага Княства Літоўскага, мяркуюць палітолагі.
Маша Макарава, Юлія Лабанава, «Белсат»
