Пастанова Савету Міністраў ад 8 снежня 2018 г. № 881 прадугледжвае, што ў базу не трапяць:
уласнікі маёмасці (заснавальнікі, удзельнікі) камерцыйных арганізацыяў (акрамя акцыянерных таварыстваў);
жонкі і мужы маладых рабочых (служачых), якія атрымалі працу па размеркаванні (пераразмеркаванні) або накіраваныя ў мясцовасць, дзе цяжка знайсці працу;
грамадзяне, якія знаходзяцца пад дыспансерным наглядам праз хранічныя або працяглыя псіхічныя расстройствы (не распаўсюджваецца на тых, хто пакутуе на сіндром залежнасці ад алкаголю, наркотыкаў ці таксічных рэчываў);
жонкі, мужы дыпламатаў, якія знаходзяцца за мяжой;
грамадзяне Беларусі перадпенсійнага ўзросту, якія падчас папаўнення базы ў першым паўгоддзі 2018 года, на 1 студзеня 2019 года дасягнуць пенсійнага ўзросту або будуць асобамі старэйшымі за гэты ўзрост, а падчас папаўнення ў другім паўгоддзі 2018 года – грамадзяне, якія на 1 ліпеня 2019 года стануць пенсіянерамі або будуць асобамі старэйшымі за пенсійны ўзрост;
бацькі, калі дзіцяці споўнілася 7 гадоў у паўгоддзі, у якім папаўняецца база.
Па стане на 1 снежня ў базу дармаедаў трапіў кожны 10-ты працаздольны беларус.
Паводле Нацыянальнага статыстычнага камітэту, цяпер у эканоміцы краіны занятыя 4 млн 356 тыс беларусаў. Афіцыйна зарэгістраваных беспрацоўных у краіне 14 600.
Дэкрэт аб папярэджанні сацыяльнага ўтрыманства ў красавіку 2015-га года падпісаў Аляксандр Лукашэнка. Спачатку ініцыятыва змусіць беспрацоўных плаціць падатак правалілася – на вуліцы па ўсёй краіне выйшлі незадаволеныя грамадзяне, а дэкрэт перагледзелі.