Раніцай 28 сакавіка дэпутаты Сейма Польшчы прынялі антыкрызісны план ва ўмовах пандэміі каронавірусу, піша Business Insider.
Антыкрызісны план быў ухвалены Сеймам 28 сакавіка прыблізна а 6-й раніцы. Некаторыя дэпутаты галасавалі дыстанцыйна.
Задача антыкрызіснага плану – змякчыць негатыўныя наступствы пандэміі каронавірусу для эканомікі Польшчы. Дакумент прадугледжвае захады для захавання працоўных месцаў, падтрымку бізнесу, дадатковае фінансаванне сістэмы аховы здароўя, абарону дзяржаўных інвестыцыяў і фінансавай сістэмы.
Напрыклад, плануецца часова вызваліць ад выплаты страхавых узносаў (ZUS) работнікаў мікрапрадпрыемстваў і самазанятых з нізкім прыбыткам, а таксама знізіць на 90% арэндную плату. Будуць прынятыя меры па абароне спажыўцоў ад празмернага павышэння коштаў, прадаўжэнню тэрмінаў знаходжання і дазволу на працу для іншаземцаў.
Таксама частка працоўных, у прыватнасці тыя, хто працуе на дамовах падраду, атрымаюць фінансавую дапамогу каля 2 000 злотых, гаворка пра тых, хто пачаў працаваць да 1 лютага 2020 году.
З поўным спісам захадаў у межах антыкрызіснага плану можна азнаёміцца тут.
Цяпер дакумент павінен разгледзець Сенат.
ІІ belsat.eu
