Савецкія лоўкосты. Куды ляталі самалёты з Магілёўскага аэрапорту ў 70-я гады?


Сёння Магілёўскі аэрапорт круглы год абслугоўвае транзітны паветраны транспарт, апрацоўвае грузы. Улетку з Магілёва вылятаюць чартары ў Егіпет і Балгарыю, а з чэрвеня 2019 года будуць лятаць і ў Туніс. За мінулы год з Магілёўскага аэрапорту вылецелі 6485 пасажыраў. А калісьці адсюль штодзень выляталі пасажырскія рэйсы па Беларусі, у Расею і ва Украіну.

Магілёўскі аэрапорт знаходзіцца за 20 км ад Магілёву і ў 3 км ад Менскай трасы М4. У гэтым месцы аэрапорт функцыянуе з пачатку 1970-х гадоў, а дагэтуль ён знаходзіўся ў самім Магілёве. Дастаўка пасажыраў за горад ажыццяўлялася аўтобусамі з аўтавакзалу.

Так Магілёўскі аэрапорт выглядае зараз. Фота: https://vk.com/mogilevavia

Суполка «Укантаце» «Аэрапорт Магілёў» пачала дзяліцца архіўнымі здымкамі. Дзякуючы ім, мы можам пабачыць, якім быў расклад руху самалётаў з магілёўскага аэрапорту ў самым пачатку яго дзейнасці, а таксама колькі ў тыя часы каштавалі квіткі.

Фота зроблена на тэрыторыі Магілёўскага аэрапорту ў 2017 годзе. Фота: Вольга Васільева/Belsat.eu

У 1972 – 1973 гадах з Магілёўскага аэрапорту можна было ўляцець па вобласці: у Горкі, Касцюковічы, Клімавічы, Краснаполле, Крычаў, Мсціслаў і Хоцімск. Дзейнічалі і іншыя напрамкі па Беларусі – у Віцебск і Менск. Штодзённа самалёты выляталі ў Маскву і Ленінград, Кіеў, Сімферопаль і Адэсу і тры дні на тыдзень – у Бранск.

Расклад руху самалётаў з Магілёўскага аэрапорту ў 1972-1973 гг – скан дакументу з суполкі «Аэрапорт Магілёў»

Ляталі на самалётах некалькіх тыпаў: далёкія рэйсы ажыццяўлялі ў асноўным на Як-40, а рэйсы па Беларусі і па вобласці – на Ан-2 і Ан-24.

Квіткі на самалёт каштавалі ад 2 рублёў на рэйсе Магілёў – Горкі і да 22 рублёў на рэйсе Магілёў – Сімферопаль. Для параўнання, за 1 рубель у той час можна было набыць 10 кг бульбы альбо 5 пачак папяросаў «Беламор-канал», за 5 рублёў можна было набыць 1 бутэльку гарэлкі ці 1 кг цукерак «Грыльяж», а за 10 – бутэльку каньяку. Сярэдні заробак у СССР у 1979 годзе складаў 148,74 рублі: інжынеру плацілі каля 120 рублёў, лекару – 100-150 рублёў, медсястра магла зарабляць ад 80 да 120 рублёў.

1976 год. Экіпаж ЯК-40 перад вылетам. Фота з сайту http://avia.of.by

Час палёту ў тыя ж Горкі складаў 20-30 хвілінаў, у Менск можна было даляцець прыкладна за гадзіну, у Маскву – за 1 г 50 хв.

У 1980 годзе напрамкаў з магілёўскага аэрапорту стала значна болей – пасажыраў пачалі дастаўляць у Архангельск, Анапу, Вільню, Берасце, Днепрапятроўск, Данецк, Калінінград, Краснадар, Харкаў і іншыя гарады.

Расклад руху самалётаў з Магілёўскага аэрапорту ў 1980 г. – архіўны дакумент суполкі «Аэрапорт Магілёў»

А ў 1985 годзе колькасць напрамкаў, наадварот, зменшылася.

Расклад руху самалётаў з Магілёўскага аэрапорту ў 1985 г. Архіўны дакумент суполкі «Аэрапорт Магілёў»

У Магілёўскім аэрапорце дзейнічалі нормы бясплатнага правозу на ручны багаж вагой да 20 кг на двухматорных самалётах і ручны багаж да 10 кг на аднаматорных. Таксама дазвалялася бясплатна правозіць дзяцей да 5 год.

Вольга Васільева/Belsat.eu

Глядзі таксама
Каментары