У Лондане праходзіць саміт да 70-й гадавіны NATO, які будзе доўжыцца два дні – 3 і 4 снежня. У ім бяруць удзел лідары 28 еўрапейскіх краінаў, прэм’ер Канады і прэзідэнт ЗША Доналд Трамп. У межах саміту запланаваны шэраг двухбаковых перамоваў.
Падчас двухбаковай сустрэчы з прэзідэнтам Францыі Эманюэлем Макронам амерыканскі прэзідэнт Доналд Трамп заявіў, што ў ЗША нармальныя адносіны з расейскім бокам, піша Reuters.
Кіраўнік ЗША нагадаў, што казаў пра важнасць захаваць добрыя стасункі з Масквой яшчэ падчас сваёй перадвыбарчай кампаніі.
«Думаю, што гэта было б нядрэнна, паладзіць з Расеяй», – адзначыў Трамп.
Сказаўшы гэта, Трамп павярнуўся да Макрона і дадаў, што іхныя погляды на гэтае пытанне супадаюць.
Раней Макрон вобразна ацаніў стан справаў у NATO і заявіў, што ў Альянсе наступіла «смерць мозгу».
«Мае словы пра «смерць мозгу NATO» шакавалі шмат каго, але я ад іх не адмаўляюся», – заявіў Макрон.
Альянс павінен дакладна разумець, якая ягоная асноўная мэта, дадаў французскі прэзідэнт. Паводле яго, цяпер у NATO няма адзінай пазіцыі нават у пытанні сучаснага вызначэння тэрарызму.
ЮВ belsat.eu