Рыбка хоча падзякаваць асабіста Лукашэнку, але ў кіраўніка дзяржавы сустрэча з ёй не запланавана
Пра асабістую сустрэчу Анастасіі Вашукевіч і кіраўніка краіны пакуль не вядзецца, аднак яна можа адбыцца як і сустрэча з любым іншым грамадзянінам краіны, распавяла прэсавая сакратарка кіраўніка Беларусі Наталля Эйсмант. Пра гэта паведамляе Радыё «Свабода».
«Пакуль у планах такой сустрэчы няма. Але калі будзе адпаведны зварот – будзем разглядаць. Нароўні з усімі іншымі падобнымі просьбамі аб арганізацыі сустрэчы. Ніякай антыпатыі ў прэзідэнта да грамадзянкі Беларусі Анастасіі Вашукевіч няма», – сказала Наталля Эйсмант.
Насця Рыбка (сапраўднае імя – Анастасія Вашукевіч) паходзіць з Бабруйску. Яна здабыла вядомасць пасля расследавання Аляксея Навальнага, прысвечанага сувязям алігарха Алега Дзерыпаскі з віцэ-прэм’ерам Расеі Сяргеем Прыходзькам. Рыбка апублікавала відэа, на якім Дзерыпаска і Прыходзька плаваюць на яхце і абмяркоўваюць умяшанне ў амерыканскія выбары.
У лютым 2018 года Насцю Рыбку разам з Алексам Леслі (таксама беларусам Аляксандрам Кірылавым) затрымалі ў Тайландзепаводле абвінавачвання ў зводніцтве з удзелам няпоўнагадовых. Амаль год яны правялі ў тайскай турме. Пасля дэпартацыі ў Беларусь 17 студзеня сёлета ў аэрапорце «Шарамецьева» паліцыя Масквы затрымала Рыбку і Леслі па справе аб арганізацыі прастытуцыі. Але Аляксей Навальны і Фонд барацьбы з карупцыяй прыйшлі да высновы, што алігарх Алег Дзерыпаска асабіста замовіў затрыманне Анастасіі Вашукевіч.
22 студзеня Рыбку і Лэслі вызвалілі з турмы пад падпіску аб яўцы. Адначасова з’явілася інфармацыя, што да іх вызвалення нібыта датычны асабіста Аляксандр Лукашэнка. Яшчэ да вызваленне беларусаў прэс-сакратар Лукашэнкі Наталля Эйсмант паведаміла, што кіраўнік дзяржавы даручыў «неадкладна заняцца вызваленнем» Рыбкі. Міністр замежных справаў Уладзімір Макей, каментуючы вызваленні беларускі, заявіў, што гэта «комплексная заслуга».
У інтэрв’ю парталу TUT.BY Анастасія Вашукевіч распавяла, што хоча асабіста падзякаваць Аляксандру Лукашэнку за яго дапамогу ў яе вызваленні.
«Я яшчэ падзякую. Адмыслова запісалася на аўдыенцыю праз месяц. Там досыць строгая чарга», – заявіла яна.
Пры гэтым дзяўчына не змагла патлумачыць, якім чынам яна запісалася на прыём. Паводле яе словаў, яе запісалі «і паставілі перад фактам».
СК belsat.eu
