Беларусь і Расея могуць падпісаць праграму дзеянняў дзеля інтэграцыі ў верасні. Пра гэта 23 жніўня заявіў беларускі прэм’ер Сяргей Румас, паведамляе БелТА.
Як адзначыў прэм’ер-міністр, праграма налічвае 66 пунктаў, якія практычна ўсе ўзгодненыя.
«Дамова ахоплівае ўсе сферы эканомікі, сацыяльныя пытанні і накіраваны на далейшае паглыбленне інтэграцыі з Расейскай Федэрацыяй», – сказаў Румас.
У праграме закладзеная канцэпцыя, якая мае на ўвазе выкананне прынцыпу «дзве краіны – адзін рынак». Па гэтай праграме да 1 лістапада плануецца распрацаваць каля 28 дарожных карт, якія будуць прадугледжваць пералік мераў па стварэнні агульных рынкаў у галінах эканомікі.
Для субʼектаў гаспадарання гэтая праграма перадусім азначае роўныя ўмовы па энерганосьбітах, падатковай нагрузцы, рэгулятарных патрабаваннях.
18 ліпеня кіраўнік Беларусі на перамовах з Уладзімірам Пуціным прапанаваў зняць усе праблемныя пытанні ў дачыненнях паміж краінамі да 20-годдзя саюзнай дамовы, то бок да снежня 2019 года.
МГ belsat.eu
