РПЦ назвала пакаранні за малітву ў «забароненых» цэрквах Канстанцінопальскай патрыярхіі


Праз разрыў еўхарыстычных зносінаў РПЦ з Канстанцінопальскім патрыярхатам за малітву ў «забароненых» цэрквах вернікі будуць вымушаныя пакаяцца ў гэтым «граху» падчас споведзі, а святара могуць пазбавіць сану і нават адлучыць ад царквы.

Вернікі РПЦ пасля рашэння Святога Сінода не павінны маліцца ў цэрквах Канстанцінопальскай патрыярхіі, нагадаў сакратар Аддзелу вонкавых царкоўных сувязяў Маскоўскага патрыярхату протаіерэй Ігар Якімчук, паведамляе interfax.ru. Ён пералічыў спіс месцаў, дзе знаходзяцца «забароненыя» для вернікаў РПЦ цэрквы.

«Замах на кананічную тэрыторыю»: РПЦ разарвала адносіны з Канстанцінопалем

Якімчук растлумачыў, што ў Турцыі гаворка ідзе пра ўсе стамбульскія цэрквы і пра адну царкву ў Анталіі, дзе адпачывае шмат турыстаў з Расеі. Акрамя таго, пад забарону падпадае шэраг цэркваў у Грэцыі – на Крыце і на астравах Дадэканэс. Забарона будзе распаўсюджвацца і на цэрквы Афона.

«Вядома, ёсць яшчэ Афон, які таксама ў юрысдыкцыі Канстанцінопаля, але адпачываць туды не ездзяць», – дадаў ён.

Калі вернікі не будуць прытрымлівацца рашэння Сінода, ім трэба будзе пакаяцца пра гэта на споведзі, папярэдзіў Якімчук.

«За адмову прытрымлівацца гэтых забаронаў для духавенства прадугледжаныя пакаранні, а для вернікаў – пакаянне на споведзі ў непаслушэнстве царкве», – сказаў прадстаўнік РПЦ.

У арт. 6 Палажэння аб царкоўным судзе РПЦ гаворыцца, што «кананічнае пакаранне павінна заахвочваць чальца РПЦ, які здзейсніў царкоўнае правапарушэнне, да пакаяння і выпраўлення». Само пакаранне не можа быць накладзенае «без дастатковых доказаў віны дадзенай асобы» і ў адпаведнасці з 28-м правілам Карфагенскага сабору (які прайшоў у 419 годзе). Сярод пакаранняў для святароў прадугледжваецца вызваленне ад пасады, часовае або пажыццёвая забарона служэнне ў царкве, пазбаўленне сану і адлучэнне ад царквы, піша rbc.ru.

ЮВ, belsat.eu

Глядзі таксама
Каментары