Рост падаткаў, айчынная вакцына і 10 год Плошчы-2010. Галоўнае за мінулы тыдзень у малюнках


Мастак Дэ Лёс разам з «Белсатам» узгадвае падзеі мінулага тыдня і дзеліцца ўласным поглядам на іх.

Разам з нашым мастаком азірнуліся на папярэднія сем дзён і на тое, які след яны пакінуць у гісторыі.

Панядзелак: айчынная вакцына ад каронавірусу

Малюнак: Дэ Лёс

На вынаходніцтва беларускай вакцыны ад каронавіруса можа сысці Br5 млн. Пра гэта Аляксандр Лукашэнка заявіў 15 снежня на сустрэчы з калектывам Магілёўскай абласной клінічнай больніцы.

«Я вельмі рады, што нашы навукоўцы замахнуліся на вытворчасць уласнай вакцыны. Перакананы, што мы ад гэтай заразы [каронавіруса] нікуды не падзенемся. Яна застанецца з намі, як грып. Значыць, нам патрэбная будзе вакцына. Трэба сваю распрацаваць, спецыялісты ёсць. Трэба брацца за гэта і не баяцца, – падкрэсліў Лукашэнка. – Там грошы, я паглядзеў, невялікія: дзесьці каля пяці мільёнаў рублёў. І мы акупім гэта, толькі трэба хутка рухацца ў гэтым кірунку».

5 млн рублёў па цяперашнім курсе – гэта каля 2 млн долараў. Паводле спецыялістаў, у ЗША ўвесь цыкл стварэння вакцынаў ад небяспечных інфекцыйных захворванняў каштуе ад 1,2 млрд да 8,4 млрд долараў. Напрыклад, бюджэт Беларусі на 2021 год – каля 10 млрд долараў. Такі высокі кошт вакцынаў абумоўлены шматлікімі складанасцямі і маштабамі неабходных даследаванняў.

Што за вакцына атрымаецца за 2 млн долараў, цяжка сказаць. Ну і зразумела, паддоследнымі мышамі, калі што, тут будуць беларусы.

Аўторак: суды над пенсіянерамі

Малюнак: Дэ Лёс

На пачатку тыдня ў Менску праходзілі суды над пенсіянерамі, якія былі затрыманыя на Маршы мудрасці ў панядзелак, 14 снежня. У РУУС у той дзень прывезлі каля ста чалавек. Найстарэйшай жанчыне – 89 гадоў. За «фашысцкі» сцяг, а значыць і за фашызм, судзілі і 87-гадовую габрэйку Лізавету Бурсаву, якая, у адрозненні ад іншых чальцоў сваёй сям’і, цудам пазбегла гета.

Аб’ектыў
Уратавалася ад фашыстаў, але не ад беларускага суда. За сцяг асудзілі пенсіянерку
2020.12.15 23:06

Серада: з аўчаркамі па БЧБ

Малюнак: Дэ Лёс

Абсурд становіцца неад’емнай часткай жыцця. У Магілёве аўчарка палову кіламетра ішла па следзе «злачынцаў», што на дрэвах намалявалі БЧБ-палосы. Паглядзіце відэа і палічыце, колькі аператыўных груп задзейнічалі ў спецаперацыі па «ліквідацыі» небяспечных элементаў – бацькі, дачкі і сяброўкі.

Чацвер: санкцыі ЕЗ

Малюнак: Дэ Лёс

Еўразвяз увёў 17 снежня трэці пакет санкцый супраць Беларусі. У спісе – бізнесоўцы Мікалай Верабей і Аляксандр Шакуцін, кіраўнік Белтэлерадыёкампаніі Іван Эйсмант, былы міністр аховы здароўя, цяпер – старшыня Гарадзенскага аблвыканкаму Уладзімір Каранік, старшыня Савету Рэспублікі Наталля Качанава і шмат іншых вядомых і малавядомых людзей, напрыклад шэраг суддзяў, якія адзначыліся адыёзнымі выракамі супраць пратэстоўцаў.

Незадаволенымі спісам аказаліся ўсе. Улады сказалі, што ім ёсць, чым адказаць. А апазіцыя палічыла спіс замалым.

«Здрадай і пляўком у твар беларусаў» назваў спіс рэжысёр Мікалай Халезін. «Па нейкай прычыне ўсе сурʼёзныя кейсы выдаленыя, а некаторыя «гаманцы» Лукашэнкі выкрасленыя ў апошні момант – адзін з іх шарыкавай ручкай (!), гэта значыць пасля ўсіх узгадненняў. Напэўна, прыйшоў час атакаваць не толькі яго [Аляксандра Лукашэнкі], але і «партнёраў», якія вядуць сябе як мінімум дзіўна, а як максімум подла«, – напісаў Халезін.

Пятніца: падымаем падаткі

Малюнак: Дэ Лёс

На мінулым тыдні было багата навінаў пра меркаваны рост падаткаў. Гэта закране айцішнікаў, мабільных аператараў (зразумела, і карыстальнікаў сотавай сувязі), аўтамабілістаў, якія будуць цяпер пад кантролем падаткавікоў плаціць дарожны збор, а пры мінанні мяжы, верагодна, і плаціць за гэта. Можна смела меркаваць, што гэтым рост падаткаў не скончыцца.

Субота: 10 год Плошчы-2010

Малюнак: Дэ Лёс

19 снежня споўнілася 10 год самай вялікай акцыі пратэсту пасля прэзідэнцкіх выбараў. Прынамсі так лічылася да 2020 году. Мы зрабілі падрабязную аналітыку, чым падзеі 2010 году і 2020 году не падобныя.

Нядзеля: апошні дзень выезду за мяжу

Малюнак: Дэ Лёс

З 21 снежня Беларусь закрыла наземныя межы на выезд з краіны. Улады гэта патлумачылі каронавіруснай небяспекай. Немагчыма зразумець сэнс такога рашэння, маўляў, нельга раскідвацца каронавірусам і вывозіць яго за мяжу, самім спатрэбіцца.

Рэпартаж
Хто хацеў з’ехаць – ужо з’ехаў: што адбываецца на мяжы перад яе закрыццём на выезд
2020.12.20 17:04

AB, belsat.eu

Стужка навінаў