«Я буду гэта есці!» – так называецца зборнік рэцэптаў з нашага амаль аднайменнага кулінарнага шоу «Я не буду гэтага есці!».
Як прыгатаваць аўсянку, гарбуз і мазгі, каб пальчыкі аблізвалі нават тыя, хто з дзяцінства на гэтыя прадукты глядзець не можа? Каманда кулінарнага шоу «Я не буду гэтага есці!» спраўляецца з такой задачай вось ужо год. 25 лютага 2018 года ў эфір выйшла нашае першае выданне!
За гэты час шэф-кухары Вольга Прыгарава і Аляксандр Чыкілеўскі падзяліліся дзясяткамі першакласных спосабаў прыгатаваць прадукты, якія трапілі ў няласку не толькі зорак-гасцей праграмы: з манкі, сала і мазгоў ім удалося стварыць маленькія кулінарныя шэдэўры. Чаго варты хаця б папкорн з груцы!
Да дня нараджэння перадачы самыя цікавыя і ўлюбёныя рэцэпты нашых шэф-кухараў выйшлі пад адной вокладкай. Пра зборнік рэцэптаў «Я не буду гэтага есці!» распавядае аўтарка шоу Аліна Коўшык.
МВ: Усе рэцэпты з праграмы выкладзеныя ў інтэрнэце. Адкуль з’явілася ідэя выдаць асобную кнігу?
АК: Інтэрнэт інтэрнэтам, але кулінарная кніга – гэта зусім іншы ўзровень задавальнення і эстэтыкі. Таму наша каманда сышлася на ідэі, што прыгожы зборнік рэцэптаў – выдатны спосаб падвесці рысу пад другім сезонам праграмы. З мноства рэцэптаў, якімі за год падзяліліся Вольга і Аляксандр, мы выбіралі паводле прынцыпу арыгінальнасці і разнастайнасці. У выніку ў кніжку ўвайшлі рэцэпты першакласных страваў з простых, даступных прадуктаў: груцы, рачной рыбы, бульбы і нават мазгоў.
МВ: Але ці змогуць прыгатаваць стравы ад шэф-кухараў тыя, хто ў кулінарыі не такі моцны?
АК: Перш за ўсё зборнік ацэняць аматары кулінарных эксперыментаў, бо нават галубцы ці аліўе ў выкананні нашых шэфаў робяцца незвычайнымі стравамі, годнымі любога стала. Пры гэтым быць прасунутым кулінарам зусім не абавязкова: дастаткова жадання гатаваць і любові да страваў з разыначкай. А яшчэ са зборніка можна даведацца, за якую страву Вольга Прыгарава перажывала, як за свой першы пацалунак, што пісьменнік Віктар Марціновіч назваў «прыгатаваным нібыта на Сатурне» і з якога сняданку вядоўца Кацярына Пытлева гатовая пачынаць кожны дзень.
МВ: Ну і галоўнае – дзе знайсці кнігу?
АК: Пакуль купіць кнігу нельга, але мы з задавальненнем будзем дарыць яе нашым гледачам. І першая магчымасць атрымаць зборнік, а заадно і паўдзельнічаць у яго прэзентацыі, ёсць ужо зараз – за падрабязнасцямі заходзьце на наш профіль на Facebook.
Марына Вашкевіч