Раніцай 19 жніўня амапаўцы з’явіліся каля прахадной МТЗ і каля будынку БТ. Сілавікі адціскаюць людзей, пачаліся затрыманні.
Раніцай каля прахадной МТЗ сабраліся мітынгоўцы, каб падтрымаць працаўнікоў.
Але пазней да будынку пад’ехаў аўтазак і выйшлі амапаўцы. Сілавікі разагналі людзей, якія сабраліся падтрымаць працаўнікоў заводу.
У МУС афіцыйна паведамілі, што каля прахадной МТЗ адбылося несанкцыянаванае масавае мерапрыемства. Яго ўдзельнікі нібыта перашкаджалі працаўнікам патрапіць на працоўнае месца. У выніку міліцыянты адціснулі натоўп і затрымалі дваіх удзельнікаў акцыі.
Затрымалі і некалькіх удзельнікаў пікетаў каля Менскага маторнага заводу. Але амапаўцы пеарапісалі звесткі людзей і адпусцілі.
З 7:30 раніцы міліцэйскія кардоны з’явіліся на падыходах да будынку Белтэлерадыёкампаніі. Адміністрацыя склала спісы ўдзельнікаў страйку і цяпер у людзей забіраюць пропускі.
Акцыю на ганку будынку Макаёнка, 9 разагналі. Але працаўнікі тэлебачання заявілі, што будуць збірацца на скрыжаванні праспекта Незалежнасці і Макаёнка. Паведамляецца, што замест звольненых з БТ працаўнікоў завезлі мантажыстаў з расейскага тэлеканала РТ. Ім абяцаюць за працу плаціць па 5 тысячаў рублёў.
Амапаўцы і аўтазак з’явіліся каля заводу «Атлант». Працаўнікі прадпрыемства выйшлі да прахадной у свой абедзенны перапынак. Міліцыянты ў мегафон запатрабавалі ад людзей разысціся. Акцыя закончылася без затрыманняў.
Амапаўцы зʼявіліся на «Белшыне». Сілавікі патрабуюць ад мітынгоўцаў разысціся. Пакуль міліцыянты не затрымліваюць. Людзі працягваюць выходзіць і абвяшчаюць страйк.
У Салігорску працаўнікі «Беларуськалій» маюць намер працягнуць акцыю салідарнасці. Вядома, што завод працуе і руда паступае на апрацаванне.
Каля двух тысячаў чалавек працягваюць забастоўку на прадпрыемстве «Горадняжылбуд». Людзі прапаноўваюць арганізаваць стачкам.
Шмат людзей сабраліся ранкам на акцыю дзеля падтрымання зніклых без вестак і рэпрэсаваных людзей каля Камароўскага рынку ў Менску. Міліцыянты папярэдзілі людзей, што акцыя не санкцыянаваная і калі ўдзельнікі пікету не разыдуцца, то будуць ужываць захады.
Міністэрства аховы здароўя паведаміла пра чарговую ахвяру масавых пратэстаў у Беларусі. 19 жніўня памёр Генадзь Шутаў. 13 жніўня яго ў цяжкім стане перавялі з Берасцейскай абласной больніцы хуткай медычнай дапамогі ў шпіталь Міністэрства абароны. Вечарам 18 жніўня ў Генадзя Шутава адбылося рэзкае пагаршэнне стану, і, не гледзячы на ўсе высілкі лекараў, выратаваць пацыента не ўдалося.
TUT.by паведамляе, што Генадзя Шутава даставілі ў больніцу з агнястрэльным раненнем. Сілавікі стрэлілі ў яго 11 жніўня ў Берасці.
Родныя Генадзя распавядаюць, што мужчына не быў актыўным удзельнікам пратэсту. Ён не ўмешваўся ў канфлікт, а проста ішоў па вуліцы, калі атрымаў смяротнае раненне. Відавочцы распавядаюць, што ў Генадзя стрэлілі з даху будынку насупраць.
Акцыі салідарнасці адбыліся каля Купалаўскага тэатру. Акторы выйшлі да будынку і спявалі народныя песні. Пазней акторы далучыліся ад акцыі каля філармоніі.
Студэнты і выкладчыкі БДУ выйшлі на мірную акцыю каля будынку ўніверсітэту. Навучэнцы збіралі подпісы з патрабаваннем адстаўкі Лукашэнкі. Петыцыю з подпісамі ініцыятары перадалі ў рэктарат.
