Тры гады таму над Данбасам быў збіты пасажырскі «Боінг 777», які ляцеў з Амстэрдаму ў Куала-Лумпур. Загінулі 298 чалавек.
Паводле вынікаў міжнароднага следства, ракету выпусцілі з комплекса «Бук», які прыбыў на Данбас з Курскай вобласці. Журналісцкая група «Bellingcat» высветліла, што за транспартаванне «Бука» адказваў Сяргей Дубінскі – адстаўны расейскі разведчык. Гэтую інфармацыю «Новай газеце» пацвердзіў і ягоны былы саслужывец у Афганістане.
Расея адмовілася дапамагаць краінам, якія праводзяць расследаванне
І сталася адзінаю дзяржавай з усіх сябраў Рады Бяспекі ААН, што заблакавала рэзалюцыю аб стварэнні міжнароднага трыбуналу. Выконваць рэзалюцыю Крэмль заклікаюць і цяпер, напярэдадні суда, які пройдзе ў Нідэрландах.
«Мы зробім усё, што ў нашых сілах. Магчыма, будзе праходзіць завочны судовы разбор. Некаторыя са сведак могуць быць затрыманыя ў Расеі. Я, вядома, заклікаю Расею выканаць рэзалюцыю Рады Бяспекі ААН і зрабіць усё магчымае, каб прыцягнуць гэтых людзей да адказнасці», – заявіла Джулі Бішап, кіраўніца МЗС Аўстраліі.
Сяргей Дубінскі, паводле журналістаў, у Растове
Ігар Стралкоў, што на момант атакі на «Боінг» быў ягоным непасрэдным камандзірам, збіраецца дэбатаваць у гэтую пятніцу з апазіцыянерам Навальным. Кіраўніцтва вайсковай часткі ў Курскай вобласці, адкуль прыбыў смертаносны«Бук», працягвае працаваць. Нікога з іх не дапыталі.
Крэмль працягвае адмаўляць віну Расеі ў гібелі трох сотняў пасажыраў «Боінга». Незалежныя расследаванні ўлады Расеі называюць «фальсіфікацыяй» і «русафобскім спектаклем». І працягваюць вінаваціць у здарэнні Украіну.
Неба над зонай Антытэрарыстычнай аперацыі было адкрытае для палётаў лайнераў. А вось Расея напярэдадні трагедыі, як сталася вядома сёння, закрыла паветраную прастору над Растоўскаю вобласцю на вышыні, што прастрэльваецца «Букам».
Расейскай версіі не вераць сваякі загінулых
«Нам сказалі, што неўзабаве мы ўсе даведаемся, і гэта ўсяго толькі пытанне часу, калі злачынцаў можна будзе прыцягнуць да адказнасці», – з надзеяй у голасе кажа Салім Сармо, бацька загінулага пасажыра.
Сёння ля амбасады Расеі ў Гаазе родныя пасажыраў «Боінгу» ўсталявалі лаўку з мемарыяльнаю табліцаю. На ёй напісана – «Чакаем адказнасці і поўнай яснасці. Чалавечнасць вышэйшая за палітыку».
Маша Макарава, «Белсат»
