Перапахаванне закатаваных у Вільні ўдзельнікаў паўстання 1863 года пачнецца 20 лістапада. Пра гэта паведаміў belsat.eu старшыня Таварыства беларускай культуры ў Літве Алесь Адамковіч.
Суразмоўца адзначыў, што 20 лістапада труны з парэшткамі паўстанцаў, у тым ліку і лідара паўстання Кастуся Каліноўскага, перанясуць у віленскі Палац валадароў.
Асноўныя ўрачыстыя падзеі пачнуцца 22 лістапада з урачыстай Імшы ў кафедральным касцёле з удзелам афіцыйных асобаў і каталіцкіх біскупаў Беларусі, Літвы і Польшчы.
Пасля ўрачыстай працэсіяй у суправаджэнні вайскоўцаў труны накіруюцца на могілкі Роса, дзе і адбудзецца перапахаванне.
Па словах Адамковіча, дадатковыя нюансы развітання з паўстанцамі будуць вядомыя пасля паседжання 8 кастрычніка Камітэту пра перапахаванне паўстанцаў.
Парэшткі паўстанцаў былі знойдзеныя ў 2017 годзе падчас абвалу на гары Гедыміна ў Вільні. Надпісы на надмагіллях будуць на трох мовах: літоўскай, польскай ды беларускай.
МГ belsat.eu
