Хочаш дапамагчы медыкам у барацьбе з каронавірусам, але не ведаеш як і баішся трапіць на махляроў? Спецыяльна для цябе, а таксама для кожнага, хто хоча супрацьстаяць пандэміі, Belsat.eu зрабіў падборку дабрачынных кампаніяў, якія збіраюць сродкі, каб абараніць краіну ад каронавіруса.
Міністр здароўя Уладзімір Каранік заявіў, што на пік захворвання COVID-19 Беларусь выйдзе ў канцы красавіка ці ў пачатку траўня.
А гэта значыць, што барацьба з каронавірусам працягнецца і самыя галоўныя бітвы наперадзе. Медыкі, якія знаходзяцца на першай лініі фронту, прызнаюцца, што ім перш за ўсё не хапае сродкаў індывідуальнай абароны. Як кожны з нас можа дапамагчы лекарам нават не выходзячы з дому? Мы сабралі асноўныя пляцоўкі, на якіх адбываецца збор грошай, каб забяспечыць медыкаў усім неабходным як мага хутчэй.
На пляцоўцы MolaMola размешчаны 23 кампаніі па зборы сродкаў на барацьбу з каронавірусам. Дапамагаюць актывісты не толькі медыкам, але і сталым асобам, і бяздомным.
«У больніцах Беларусі не хапае сродкаў індывідуальнай абароны для лекараў, – гаворыцца на старонцы кампаніі. – Нас зараз абсалютна не цікавіць, як атрымалася такая сітуацыя і хто ў ёй вінаваты. Галоўнае, што нас цяпер цікавіць, – гэта што рабіць. І рабіць гэта прама цяпер, не заўтра, не праз тыдзень, калі непаваротлівыя жорны сістэмы могуць пачаць працаваць».
Валанцёры збіраюць грошы на аднаразовыя ахоўныя камбінезоны, маскі і рэспіратары індывідуальнай абароны класа FFP2 і FFP3, ахоўныя акуляры. Таго, што выдаюць лекарам, недастаткова. Таксама збіраюць грошы на дадатковае харчаванне лекараў.
Кампанія ўжо сабрала Br 158 714 . Далучыцца і ахвяраваць грошы можна тут.
Актывісты аб’ядналіся, каб падтрымаць медыкаў. Гэта не толькі грошы. Кампанія #ByCovid19 запусціла сайт, дзе кожны можа вырашыць, як ён хоча дапамагчы ў змаганні з каронавірусам. Актывісты таксама збіраюць заяўкі ад лекараў – што менавіта цяпер ім патрэбна. Калі вы працуеце ў лякарнях ці хочаце дапамагчы лекарам і валанцёрам, то вам сюды.
Рэстаран Grillman зачыніўся для наведвальнікаў і працуе на тое, каб накарміць лекараў на працы хатняй смачнай ежай. З 26 красавіка каманда корміць гарачымі абедамі медперсанал Менскай гарадской клінічнай інфекцыйнай больніцы. З 1 красавіка яны развозяць 100 порцый абедаў штодня для менскай лякарні № 6.
«Мы ўсё роўна плацім арэнду, камуналку і зарплату персаналу. У нас ёсць усё неабходнае абсталяванне. Мы самі і нашы партнёры пацягнем большую частку выдаткаў. Нам дапамагаюць ужо многія. Аднак, нашы партнёры і мы не можам пакрыць усе выдаткі, таму мы звяртаемся да вас па дапамогу».
Удалося сабраць ужо Br 38 625. Зрабіць свой унёсак можна тут.
Кампанія Symbal.by пераарыентавала швейны цэх на вытворчасць шматразовых масак ды іх бясплатны распаўсюд для тэрміновых патрэбаў. Кампанія сабрала Br 9 534. Дапамагчы ініцыятыве можна тут.
Збор сродкаў у сувязі з пандэміяй каронавірусу праводзіць і праект «Имена». Грошы мусяць ісці на закупы сродкаў абароны для 15 000 сацыяльных працаўнікоў, 175 медычных сясцёр Чырвонага крыжа і прыкладна 175 валанцёраў.
«Патрэбныя антысептыкі, пальчаткі, ахоўныя халаты, маскі – менавіта аднаразовыя, якіх не хапае. Гэтыя людзі некалькі разоў на тыдзень абыходзяць 92 000 адзінокіх хворых пажылых людзей. Носьбітам віруса можа быць любы – уключаючы сацыяльных працаўнікоў, медсясцёр, валанцёраў. Каб абараніць і адных, і другіх, важна цяпер сабраць Br 469 791», – падкрэсліваюць «Имена».
Кампанія разлічаная на тое, каб забяспечыць сацыяльных працаўнікоў, медыкаў і валанцёраў аднаразовымі сродкамі аховы на трохмесячны тэрмін – з красавіку па чэрвень. Ужо сабралі 41 % агучанай сумы – Br 205 501. Павялічыць дабрачынныя сродкі можна тут.
Дабрачынныя рахункі ў беларускіх рублях ды еўра для ўсіх, хто хоча дапамагчы ў барацьбе з каронавірусам, мае Міністэрства аховы здароўя. Яшчэ 24 сакавіка ў ведамстве паведамілі, што сродкі будуць накіраваныя на правядзенне санітарна-супрацьэпідэмічных мерапрыемстваў, а таксама на выяўленне і лячэнне пацыентаў з COVID-19. Рахунак належыць дзяржаўнай установе «Рэспубліканскі цэнтр арганізацыі медычнага рэагавання». Грошы з яго будуць размяркоўвацца пасля ўзгаднення з Міністэрствам аховы здароўя.
«Мы вітаем падтрымку грамадства і зможам выкарыстоўваць дабрачынную дапамогу ў мэтах закупаў абсталявання для лабараторнай дыягностыкі COVID-19, дыягнастычных набораў, ахоўных сродкаў, лекавых прэпаратаў, а таксама на аказанне дапамогі хворым», – падкрэсліла прэс-служба міністэрства.
Рэквізіты рахункаў можна знайсці тут.
На жаль, ёсць і махлярства пад выглядам дабрачыннасці. Напрыклад, «БПС-Сбербанк» 23 сакавіка распаўсюдзіў прэс-рэліз, што махляры імітуюць афіцыйную рассылку на мабільны тэлефон і паведамляюць аб аднабаковым рашэнні банку пералічыць працэнты па дэпазіце ў Фонд барацьбы з каронавірусам у адпаведнасці з пастановаю Савету міністраў.
«Памятайце, Банк ніколі не робіць такога кшталту рассылак і наяўнасць гэтай пастановы з’яўляецца хлуснёй», – падкрэслілі ў «БПС-Сбербанку».
У банку раяць кліентам нікому не паведамляць свае паролі і нумары картак, не адказваць на такія паведамленні і не пераходзіць па спасылках.
Тэлеканал «Белсат» не збірае грошы на дапамогу медыкам, мы прадстаўляем спраўджаную інфармацыю, на якіх пляцоўках адбываецца збор сродкаў і падказваем, да якіх ініцыятыў можна далучыцца нават не выходзячы з дому.
Абаронім медыкаў разам, каб было каму нас ратаваць ад нябачнага ворага!
Анастасія Русецкая Belsat.eu