З Савету Бяспекі на лаву падсудных. У Менску пачаўся працэс у справе Уцюрына
Вярхоўны суд 10 сакавіка распачаў разгляд карупцыйнай справы аб карупцыі пры пастаўках у Беларусь тэлекамунікацыйнага абсталявання, камп’ютарнай тэхнікі і праграмнага забеспячэння. На лаве падсудных 16 чалавек, у тым ліку былы намеснік дзяржсакратара Савету Бяспекі Андрэй Уцюрын.
Судовы працэс праходзіць у будынку Маскоўскага раённага суда Менску. Фігурантамі карупцыйнай справы з’яўляюцца 16 чалавек. Гэта чыноўнікі, прадстаўнікі дзяржаўных банкаў і камерцыйных прыватных структураў. Частку вінавацяць у атрыманні, а частку – у даванні хабараў. Агульная сума хабараў перавышае $ 1,5 млн.
З 16 падсудных 12 знаходзяцца пад вартай. Мера стрымання Броўкі – хатні арышт, Шаркова – залог, Панамарова і Томчанкі – падпіска аб нявыездзе.
Экс-начальніка Службы бяспекі прэзідэнта, былога намесніка дзяржсакратара Савету бяспекі Андрэя Уцюрына затрымалі 21 красавіка 2019 года, яму выставілі абвінавачванне паводле ч. 3 арт. 430 (даванне хабару) Крымінальнага кодэксу. Уцюрына вінавацяць у атрыманні хабараў на агульную суму не менш за $ 190 000, а таксама ў падбухторванні да давання хабараў.
Хадайніцтва Уцюрына не задаволілі
Уцюрын папрасіў зрабіць суд над ім закрытым, бо там будуць агучвацца сведчанні, што з’яўляюцца дзяржаўным сакрэтам. У прыватнасці, гаворка ідзе пра працу Савету Бяспекі, абавязкі і інструкцыі дзяржсакратарыяту, а таксама тэхнічнае забеспячэнне дзяржаўных органаў. Аднак хадайніцтва Уцюрына суддзя не задаволіў, бо на дадзеным этапе працэсу для гэтага няма падставаў.
Справа банкіраў
Як высветлілася на судзе, арышты па справе пачаліся яшчэ ў снежні 2018 года. Тады, у прыватнасці, затрымалі фактычнага кіраўніка ТАА «Мабільны сэрвіс» Уладзіміра Жыліна, старшыню праўлення Беларускага міжбанкавага разліковага цэнтру Фелікса Каспяровіча і намесніка начальніка Галоўнага ўпраўлення інфармацыйных тэхналогіяў Нацыянальнага банку Андрэя Падгорнага.
Арышт Уцюрына адбыўся 21 красавіка – гэта быў ужо фінал серыі затрыманняў па справе. Некаторыя фігуранты затрымліваліся толькі на некалькі дзён. Цікава, што адзін з абвінавачаных – Панамароў – наагул пад вартай не знаходзіўся.
Былога топ-менеджара «БПС Сбербанку» Юрыя Панамарова вінавацяць у тым, што ён атрымаў хабар ад Аляксандра Броўкі ў памеры $ 13 000 за лабіяванне інтарэсаў ТАА «Мабільны сэрвіс» пры пастаўках тэлекамунікацыйнага абсталявання. Плюс Панамарову і ягонай сям’і Броўка аплаціў пражыванне ў гатэлі ў Лондане на агульную суму £ 1 000. Броўка і Панамароў сваю віну не адмаўляюць, але сцвярджаюць, што з іншымі фігурантамі справы не знаёмыя і ніяк не звязаныя. Яны хадайнічалі аб тым, каб вылучыць іх справу ў асобны судовы працэс, аднак Вярхоўны суд просьбу Броўкі і Панамарова не задаволіў.
Паводле следства, Фелікс Каспяровіч і Андрэй Падгорны бралі хабары цягам 11 гадоў – з 2007 па 2018 год. Спачатку Каспяровіч працаваў у Нацбанку, потым атрымаў пасаду старшыні праўлення Беларускага міжбанкавага разліковага цэнтру. Разам з намеснікам начальніка Галоўнага ўпраўлення інфармацыйных тэхналогіяў Нацыянальнага банку Андрэем Падгорным яны бралі адкаты за ўзгадненне паставак банкаўскага праграмнага забеспячэння і заключэнне дамоваў на тэхнічнае абслугоўванне. Хабары дасягалі сумаў у 200 тысяч долараў за раз, грошы Каспяровіч і Падгорны часцей за ўсё дзялілі ў фармаце 50 на 50.
Агулам сума хабараў за 11 гадоў дасягнула $ 868 тысяч. Адкаты чыноўнікі атрымлівалі ад прыватных фірмаў-пастаўшчыкоў – ТАА «Мабільны сервіс», «АМТ-Груп Інтэрнэшнл», «Салідэкс», «ДПА» ды інш. Самы першы хабар, што фігуруе ў абвінавачванні, Каспяровічу і Падгорнаму ў 2007 годзе на ўласнай кухні перадаў яшчэ адзін топ-чыноўнік Нацбанку – Ігар Кудасаў (10 тысяч долараў – гэта была іх доля з хабару аднаго з бізнесоўцаў).
Падчас атрымання чарговага хабару, 29 снежня 2018 года, Каспяровіча затрымалі.
«Цалкам прызнаю сябе вінаватым», – заявіў на судзе Каспяровіч.
ІІ belsat.eu
