8 жніўня, у дзень выбуху на расейскім вайсковым аб’екце, у шасці з васьмі пунктаў Северадзвінску было зафіксаванае перавышэнне магутнасці дозы гама-выпраменьвання ў 4–16 разоў у параўнанні з фонавымі значэннямі для гэтай тэрыторыі.
З такой заявай выступіў начальнік Упраўлення стану і забруджання наваколля Расгідрамету Юрый Пяшкоў, паведамляе «Архагельск онлайн».
Сярэдняе значэнне фону для Северадзвінску складае 0,11 мкЗв/г. Пасля рэзкага скачку значэнні сталі змяншацца, і радыяцыйны фон у горадзе нармалізаваўся да 0,13-0,16 мкЗв/г. У Архангельску перавышэнняў не зафіксавалі.
Інцыдэнт з выбухам пракаментаваў у «Тўітэры» і прэзідэнт ЗША Дональд Трамп. Паводле яго, у Вашынгтоне шмат што зразумелі пасля выбуху ракеты ў Расеі, бо маюць «падобныя, хоць і больш прасунутыя тэхналогіі».
Трамп адзначыў, што выбух расейскай крылатай ракеты «Буравеснік» «прымусіў людзей турбавацца аб якасці паветра ў раёне аб’екта і далёка за яго межамі».
У выніку выбуху на сакрэтным вайсковым аб’екце ў паселішчы Нёнакса, што за 40 км ад Северадзвінску Архангельскай вобласці, загінулі пяць працаўнікоў дзяржаўнай карпарацыі «Расатам». Яшчэ трое атрымалі траўмы і апёкі рознай ступені цяжкасці.
Баючыся радыяцыі жыхары Архангельску і Северадзвінску раскупілі ў аптэках ёд.
МГ belsat.eu