Расея наклала вета на французскі праект рэзалюцыі Рады Бяспекі ААН па Сірыі


Рада Бяспекі ААН не змагла прыняць унесены Францыяй праект рэзалюцыі па Сірыі праз вета з боку Расеі. Рада Бяспекі адхіліла таксама і праект, які ўнесла Масква.

Спроба прыняць унесены Францыяй праект рэзалюцыі Рады Бяспекі ААН па сітуацыі ў Алепа ў суботу, 8 кастрычніка, правалілася. Супраць рэзалюцыі прагаласавалі Расея, якая зʼяўляецца адным з пяці пастаянных чальцоў Рады Бяспекі ААН і мае права вета, і Венесуэла. Яшчэ дзве краіны-чальцы Рады Бяспекі – Ангола і Кітай – устрымаліся пры галасаванні. За рэзалюцыю прагаласавалі 11 краін-чальцоў Рады Бяспекі.

Перад галасаваннем падтрымаць прапанаваны Францыяй праект рэзалюцыі Рады Бяспекі ААН, які прадугледжвае сярод іншага спыненні бамбаванняў гораду і поўную забарону палётаў над Алепа, заклікаў міністр замежных спраў Францыі Жан-Марк Эро. На ягоную думку, гэтая рэзалюцыя павінна выратаваць горад ад поўнага знішчэння ў выніку ўдараў сірыйскай і расейскай авіяцыі, паведамляе інфармагенцтва AFP.

Напярэдадні Расея прапанавала свой праект рэзалюцыі па Алепа, які прадугледжваў спыненне агню, але ў ім не згадвалася аб забароне палётаў над горадам. Гэты праект таксама адхілілі – ён атрымаў усяго чатыры галасы «за» і дзевяць галасоў «супраць».

Пастаянны прадстаўнік Расеі пры ААН Віталь Чуркін закінуў сваім калегам «антырасейскую пазіцыю» і назваў усё, што адбываецца, адным з найбуйнейшых «спектакляў у гісторыі Рады Бяспекі ААН». «Мы мусім прагаласаваць за дзве рэзалюцыі, ведаючы, што ніводную з іх не прымуць», – цытуе ягоныя словы агенцтва Dpa.

Затое прадстаўнік Вялікая Брытаніі пры ААН Мэцью Райкрофт назваў расейскі праект «падманам», які ніякім чынам не спрыяў бы абароне грамадзянскага насельніцтва.

МЯ, паводле dw.com

Стужка навінаў