Беларусы, якія вяртаюцца дадому з трэціх краін, змогуць зрабіць гэта з перасадкай у расейскіх гарадах, выкарыстоўваючы рэйсы расейскіх авіякампаніяў. Пра гэта журналістам паведаміў амбасадар Расеі ў Беларусі Дзмітрый Мезенцаў.
«У сувязі з выданнем адпаведнага распараджэння ўраду Расейскай Федэрацыі ніякіх праблем у грамадзянаў Беларусі, якія маюць на руках квіткі на вылет бартамі расейскіх авіяперавозчыкаў, быць не павінна», – сказаў Мезенцаў.
Паводле яго слоў, 21 сакавіка кіраўнік Федэральнага агенцтва паветранага транспарту Аляксандр Нерадзько пацвердзіў кіраўніку расейскай дыпмісіі ў Беларусі, што «усе ўказанні ў мэтах выканання ўрадавага распараджэння авіяцыйным кампаніям Расейскай Федэрацыі дадзены, перашкодаў на пасадку на борт паветраных судоў у грамадзянаў Беларусі, якія знаходзяцца на адпачынку ў трэціх краінах, быць не павінна».
Па словах дыпламата, амбасада Расеі ў Беларусі знаходзіцца ў цесным кантакце з МУС, а таксама з міністрам замежных спраў Уладзімірам Макеем, які «зрабіў вельмі шмат для таго, каб бакі аказвалі максімальную ўвагу грамадзянам, якія апынуліся ў складанай жыццёвай сітуацыі».
Нагадаем, на дадзены момант каля 6 тысяч беларускіх грамадзянаў не могуць вярнуцца дадому праз закрыццё межаў у сувязі з пандэміяй каронавірусу.
КА belsat.eu
