Расея пры патрэбе разгледзіць магчымасць выдзялення фінансавай дапамогі Беларусі. Аб гэтым заявіў міністр фінансаў Расейскай Федэрацыі Антон Сілуанаў.
«У выпадку крайняй неабходнасці мы гатовы разгледзець іхную просьбу аб дапамозе», – прыводзіць агенцтва «ТАСС» словы Сілуанава, сказаныя ў інтэрв‘ю амерыканскай тэлекампаніі «CNBC».
Пры гэтым Сілуанаў дадаў, што эканоміка Беларусі «цесна звязана» з расейскай.
«Цяпер мы вывучаем сітуацыю разам з нашымі беларускімі калегамі. Мы аналізуем усе фактары, якія аказваюць уздзеянне на эканамічную сітуацыю ў абедзвюх краінах, у прыватнасці санкцыі і падзенне цэн на нафту. Цяпер мы вядзем перамовы», – адзначыў Сілуанаў.
Пра магчымую фінансаваю дапамогу Беларусі з боку Расейскай Федэрацыі заявіў 29 студзеня на прэс-канферэнцыі ў Менску Аляксандр Лукашэнка. Адказваючы на пытанне аб гэтым, ён, у прыватнасці, сказаў: «Нам не хацелася б больш браць крэдытаў. Але я маю цвёрдыя дамоўленасці з прэзідэнтам і прэм’ер-міністрам: калі нам будзе цяжка, вельмі будзе цяжка – Расея плячо падставіць. Я працытаваў Пуціна».
Дапаможа Расея, паводле слоў Лукашэнкі, «не таму, што мы нахлебнікі, а таму, што, давайце шчыра казаць, наша эканоміка – частка расейскай эканомікі». «Мы спажываем у іх велізарную колькасць рэсурсаў, купляем на 30 мільярдаў долараў па імпарце ў тавараабароце… Мы купляем у іх камплектуючыя, даем ім працу, ствараем гатовы прадукт і палову прадаем у Расейскай Федэрацыі. Гэта выгадна для Расеі? Выгадна. Таму нікуды не дзенешся – трэба падтрымаць, калі гэта будзе неабходна. Але мне не хацелася б закрэдытоўвацца і далей».
Лукашэнка расказаў аб магчымасці атрымання чацвёртага транша крэдыту Антыкрызіснага фонду ЕўрАзЭС і аб тым, што «мільёнаў 500 Расея нам дакладна паабяцала ў мінулым годзе, што яны з бюджэту могуць выдзеліць».
Кіраўнік дзяржавы адзначыў, што Беларусь чакае няпросты год, у тым ліку ў плане пагашэння даўгоў. У 2015 годзе дзяржаве прыйдзецца пагасіць каля $ 4 млрд. ЗША вонкавай пазыкі. Разам з тым Лукашэнка ўпэўнены ў здольнасці краіны поўнасцю разлічыцца па даўгах.
Паводле Аляксей Арэшка, БелаПАН