Размяшчэнне ракетаў малой і сярэдняй далёкасці ў краінах Усходняй Еўропы, ператварае іх у ваенны плацдарм, піша расейскі вайсковы эксперт Уладзіслаў Шурыгін.
«Любая з гэтых краінаў становіцца патэнцыйнай ядравай пустэльняй», – мяркуе Шурыгін.
А жыхары гэтых краінаў ператвараюцца ў «закладнікаў, якіх пачалі расстрэльваць», сцвярджае адмысловец. Такі сцэнар падаецца эксперту цалкам праўдападобным, калі ЗША пасля дэнансавання Дамовы аб ліквідацыі ракетаў сярэдняй і меншай далёкасці прымуць рашэнне размясціць ядравую зброю ва Усходняй Еўропе.
Варта адзначыць, што афіцыйных планаў аб размяшчэнні ядравых ракетаў у Еўропе Белы дом не агучваў.
Эксперт нагадаў, што цяпер «глыбіня паласы вайны» складае 500 км. (далёкасць дзеяння комплексаў «Искандер»), якія адлічваюцца ад межаў Калінінградскай вобласці. Сёлета Вашынгтон прыгразіў Маскве выйсці з ДРСМД. Амерыканскія палітыкі сцвярджаюць, што Расея парушае гэтую дамову.
МЗС Беларусі прытрымліваецца пазіцыі, што ліквідацыя гэтай дамовы можа нанесці значную шкоду рэгіянальнай і глабальнай стабільнасці ў свеце.
У кастрычніку амбасадар Расейскай Федэрацыі ў нашай краіне Міхаіл Бабіч паабяцаў, што войскі нашых усходніх суседзяў абавязкова ўмяшаюцца ў выпадку вайсковай агрэсіі супраць Беларусі. Пра гэта дыпламат заявіў у эфіры тэлеканалу «Беларусь-1», каментуючы магчымае з’яўленне амерыканскай вайсковай базы ў Польшчы.