Футбаліст маскоўскага футбольнага клубу «Спартак» Аяз Гуліеў зламаў нос пешаходу, якога перад гэтым зачапіў на пераходзе.
Паўабаронца быў за рулём Mercedes. Па словах відавочцы, Аяз Гуліеў спрабаваў праехаць на чырвонае святло, але яму перашкодзіў мужчына, паведамляе Telegram-канал BAZA.
«Ён [футбаліст. – Заўв. belsat.eu] выскачыў з машыны, ударыў хлопца па твары, пайшоў назад. Потым вярнуўся невядома для чаго і стаў яго моцна збіваць», – сказала сведка.
Паводле інфармацыі Lenta.ru, пацярпелы быў амерыканскім турыстам.
У ФК «Спартак» адзначылі, што бакі ўладзілі канфлікт, і пешаход заявіў, што не мае ніякіх прэтэнзіяў да футбаліста. Тым не менш кіраўніцтва клубу, вырашыла ўжыць да Гуліева строгія дысцыплінарныя санкцыі, бо «асуджае любыя праявы гвалту і лічыць падобныя паводзіны свайго гульца недапушчальнымі».
Нагадаем, што ў кастрычніку 2018 года трапілі ў скандал форвард «Зяніта» Аляксандр Какорын і паўабаронца «Краснадару» Павел Мамаеў, у дачыненні спартоўцаў завялі крымінальную справу.
Іх вінавацяць у збіцці чыноўніка расейскага Міністэрства прамысловасці і гандлю Дзяніса Пака. Ад агрэсіўных дзеянняў спартоўцаў пацярпеў таксама 33-гадовы беларускі кіроўца.
МГ belsat.eu