Берасцейскія мытнікі канфіскавалі на памежным пераходзе «Варшаўскі мост» некалькі адзінак халоднай зброі часоў ІІ Сусветнай вайны.
Нямецкія корцікі і цясак з нацысткай сімволікай увезці ў Беларусь спрабаваў грамадзянін Расеі, які праязджаў праз мяжу на ўласным аўце. Халодная зброя знаходзілася ў салоне аўтамабіля сярод асабістых рэчаў.
Эксперты з Дзяржаўнага камітэту судовых экспертызаў прызналі, што знойдзеныя корцікі і цясак зʼяўляюцца аўтэнтычнай зброяй 1934-1937 гг., зробленыя ў Нямеччыне. Падобны корцік нямецкага афіцэра Люфтваффэ каштуе ў Расеі каля BYN 2 тысячаў.
Паводле беларускага заканадаўства, перавоз падобных рэчаў праз мяжу дапускаецца толькі паводле адмысловага дазволу.
МЛ, belsat.eu