Калі інфармацыя пра інтэграцыю Беларусі і Расеі, якую падаюць расейскія СМІ, праўдзівая, то статус нашай краіны фактычна нічым не будзе адрознівацца ад суб’ектаў Расейскай Федэрацыі. Пра гэта ў каментары belsat.eu заявіў беларускі эканаміст, кіраўнік Навукова-даследчага цэнтру Мізэса Яраслаў Раманчук.
«Калі будзе так, як напісана ў гэтым дакуменце – і прамысловая палітыка адзіная, і сацыяльная, і антыманапольная, і мытная, і падатковая – то гэта, безумоўна, паглынанне», – заявіў эканаміст.
У сітуацыі, калі нават самі расейцы заяўляюць, што ў Расеі не працуе вяршэнства права, няма незалежных судоў, а ёсць алігархізацыя і сілавы рэсурс, які ўзяў кантроль над эканомікай, гэта азначае проста здачу эканомікі пад уладу гэтых кланаў, адзначыў Раманчук.
Эксперт нагадаў, што ў Еўразвязе да пашырэння інтэграцыі ішлі 40 гадоў. І нават зараз, калі ёсць адзіная валюта, у ЕЗ няма адзінай падатковай палітыкі.
«Калі яны кажуць, што будзе адзіная мытная палітыка, аб’яднанне падатковых сістэмаў, дык чым адрозніваецца тады Рэспубліка Беларусь ад Татарстану, Башкартастану або іншых суб’ектаў Федэрацыі? Я не бачу тут ніякай розніцы», – падкрэсліў суразмоўца.
На яго думку, калі ў саюзе Беларусі і Расеі ўжо будуць перамешаныя элементы федэрацыі і канфедэрацыі, то вельмі проста будзе ўвесці і іншае аб’яднанне.
«І казаць пра тое, што застанецца Беларусь як нейкая незалежная палітычная адзінка на мапе свету, я б не казаў», – заявіў Яраслаў Раманчук.
Суразмоўца мяркуе, што калі інфармацыя расейскіх медыяў праўдзівая, то гэта адназначна з’яўляецца нацыянальнай здрадай. Бо ні ўрад, ні Адміністрацыя кіраўніка дзяржавы, ні МЗС не кансультаваліся, не запрашалі грамадскую і навуковую супольнасць, бізнес да абмеркавання такога дакументу.
«Калі ён будзе такім чынам падпісаны, тады Беларусь ператворыцца ў «Белоруссию», – лічыць эканаміст.
Нагадаем, што расейскае выданне «Коммерсантъ» прадставіла падрабязнасці праекту паглыблення інтэграцыі Беларусі і Расеі, які 6 верасня ўзгаднілі прэм’ер-міністры дзвюх краін.
У дакуменце гаворыцца аб частковай эканамічнай інтэграцыі на ўзроўні не меншым за Еўразвяз, а ў некаторых пытаннях – аналагічным канфедэрацыям ці нават федэрацыям. Фактычна гаворка ідзе пра паглынанне эканомікай Расеі эканомікі Беларусі на ўзроўні кіравання, адзначае выданне.
МГ belsat.eu