З 1 кастрычніка заробкі шэрагу дзяржаўных службоўцаў, у тым ліку прэзідэнта і прэм’ер-міністра Расеі вырастуць на 4,3 %. Адпаведны ўказ падпісаў Уладзімір Пуцін, паведамляе meduza.
Заробкі дзяржслужбоўцаў вырастуць адпаведна афіцыйнаму ўзроўню інфляцыі ў Расеі па выніках 2018 года.
Павялічацца заробкі таксама ў віцэ-прэмʼераў, міністраў, старшыні ЦВК, генеральнага пракурора, кіраўнікоў ФСБ, Расгвардыі і іншых ведамстваў.
Мінулы раз заробкі ў кіраўніцтва Расеі выраслі ў студзені 2018 года на 4 %.
meduza звяртае ўвагу, што 7 кастрычніка, у дзень падпісання ўказу, Уладзімір Пуцін адзначае свой дзень нараджэння.
Пра заробак Аляксандра Лукашэнкі, яго рост, вядома вельмі мала. Інфармацыя пра прыбыткі кіраўніка Беларусі становіцца вядомай толькі падчас выбараў, калі публікуюцца дэкларацыі кандыдатаў. Таму можна пабачыць звесткі пра прыбытак Лукашэнкі ў 2014 годзе. Згодна звесткам дэкларацыі занатавана, што Лукашэнка зарабіў 551 761 258 недэнамінаваных беларускіх рублёў, або каля $ 54 012.
Відавочна з дэкларацыяў, што заробкі Лукашэнкі растуць. Напрыклад, у 2000 годзе ён афіцыйна зарабляў каля $ 390 штомесяц ($ 4680 за год), а напярэдадні выбараў у 2006-ым гадавы даход кіраўніка Беларусі склаў амаль $ 27 600.
СК belsat.eu
