Пуцін спрагназаваў, што адбудзецца, калі Украіна атрымае кантроль над мяжой Расеі і Данбасу

10 снежня прэзідэнт Расеі Уладзімір Пуцін пракаментаваў патрабаванні прэзідэнта Уладзіміра Зяленскага аб перадачы Украіне кантролю мяжы на Данбасе. Кіраўнік Расеі мяркуе, што гэта прывядзе да разні.

Падчас паседжання Рады па правах чалавека Уладзімір Пуцін заявіў, што ў выпадку перадачы мяжы паміж Расеяй і самаабвешчанымі рэспублікамі пад кантроль Украіны можа пачацца генацыд.

«Украінскі бок увесь час ставіць пытанне: «Дайце нам магчымасць закрыць мяжу войскамі». Я ўяўляю, што далей пачнецца, – Срэбрэніца будзе, вось і ўсё. Мы ж бачылі, як Прэзідэнт Зяленскі вёў дыскусіі з нацыяналістамі [імаверна гаворка пра паездку прэзідэнта ў населены пункт Залатое. – заўв. belsat.eu]. Незразумела, хто там мацней, што там адбудзецца, і хто імі будзе кіраваць, гэтымі нацыяналістамі, калі яны ўвойдуць на гэтыя тэрыторыі без забеспячэння гарантыі людзям. Гэта адна з праблем, але яна, вядома, носіць палітычны характар», – заявіў Уладзімір Пуцін.

9 снежня ў Парыжы адбыўся саміт «нармандскай чацвёркі» прысвечаны ўрэгуляванню сітуацыі на ўсходзе Украіны. Падчас саміту Уладзімір Зяленскі паразмаўляў сам-насам з Уладзімірам Пуціным.

ЮВ belsat.eu