Праграму дзеянняў па інтэграцыі і шэраг пагадненняў кіраўнікі Беларусі і Расеі падпішуць у снежні. Пра гэта заявіў журналістам міністр эканомікі Беларусі Дзмітрый Круты, паведамляе БелТА.
«Прэзідэнты павінны падпісаць праграму і пакет дарожных мапаў, а таксама шэраг пагадненняў, якія вырашаюць для нас адчувальныя пытанні. У першую чаргу па газе. Гэта будзе прэзідэнцкі пакет», – заявіў міністр эканомікі Дзмітрый Круты.
Падпісанне дакументаў запланавана на 8 снежня, калі Дамове аб стварэнні Саюзнай дзяржавы споўніцца 20 гадоў.
«З 1 студзеня 2021 года ў асноўных сферах будуць ужо запушчаны агульныя рынкі. Гэта агульная канцэпцыя, з улікам сектаральных асаблівасцяў могуць быць адхіленні», – сказаў ён.
Міністр адказаў станоўча на пытанне, ці застаюцца паміж бакамі спрэчныя пытанні, аднак не змог патлумачыць, у якіх сферах.
Дарожная карта паглыблення інтэграцыі з Расеяй будзе гатовая ўжо ў верасні – заявіў пасля сустрэчы з Аляксандрам Лукашэнкам прэмʼер нашай краіны Сяргей Румас. Яшчэ раней кіраўнікі ўрадаў абедзвюх краінаў заяўлялі, што да лістапада бягучага году плануецца ўзгадніць усе інтэграцыйныя дарожныя карты. У абноўленай праграме дзеянняў па развіцці Саюзнай дзяржавы ў першую чаргу будуць закранутыя дарожныя карты па сектарах эканомікі.
СК belsat.eu