Прэзідэнт Беларусі Аляксандр Лукашэнка 1 сакавіка правядзе «Вялікую размову» з удзелам больш як 200 прадстаўнікоў СМІ, палітолагаў, эканамістаў, работнікаў рэальнага сектара эканомікі, грамадскіх арганізацыі і канфесій. Як мяркуюць апытаныя Belsat.eu эксперты галоўнай тэмай сёлетняга мерапрыемства маюць стаць адносіны паміж Беларуссю і Расеяй.
Метадолаг Уладзімір Мацкевіч: на першым месцы будуць інтэграцыяналісцкія гульні з Расеяй і небяспека аншлюсу ці ўтварэння на базе Саюзнай дзяржавы нейкай федэрацыі, якая дазволіць змяніць беларускую і расейскую канстытуцыі ды змяніць тэрмін Пуціна.
Але, падсумаваў Уладзімір Мацкевіч, простым людзям, не экспертам, глядзець выступ Аляксандра Лукашэнкі не варта, бо ён «ніколі нічога не гаворыць наўпрост».
Палітычны аглядальнік Раман Якаўлеўскі: падчас пятнічнага мерапрыемства ў межах «экспромту» кіраўніка дзяржавы могуць узнікнуць намёкі і на магчымы рэферэндум, датычны адносінаў з Расеяй.
Аналітык Беларускага інстытуту стратэгічных даследаванняў, палітолаг Кацярына Шмаціна: Лукашэнка на фоне напружання ў адносінах з Расеяй працягне падкрэсліваць «святасць» суверэнітэту дзяржавы. Магчыма, мы пачуем інсайты наконт працы беларуска-расейскай камісіі, якая зараз пераглядае дамовы па Саюзнай дзяржаве. Таксама варта чакаць заяваў пра агульны стан адносінаў з Расеяй па выніках нядаўніх сустрэчаў у Сочы.
Дырэктар Інстытуту развіцця і сацыяльнага рынку для Беларусі і Усходняй Еўропы Зміцер Кухлей: правядзенне пятнічнай размовы азначае больш актыўны пераход уладаў да падрыхтоўкі да прэзідэнцкіх выбараў, падчас якіх галоўнымі будуць пытанні бяспекі і суверэнітэту, бо асаблівага росту даходаў насельніцтва нябачна.
Падобная сустрэча адбылася ў лютым 2017 года і цягнулася 7 гадзінаў і 20 хвілінаў – гэта рэкорд працягласці падобных мерапрыемстваў. У сваім маналогу Лукашэнка тады паразважаў пра «абвастрэнне» дачыненняў з Расеяй, смяротнае пакаранне, беларускую мову, зніклых палітыкаў і нашумелы «дармаедскі» дэкрэт.
МГ, belsat.eu