Прэзідэнт Доналд Трамп правёў тэлефонную размову з адным з лідараў руху «Талібан» Абдулой Гані Барадарам. Гэта першы вядомы выпадак наўпроставых перамовах амерыканскага прэзідэнта і аднаго з лідараў «Талібану», адзначае Reuters.
Падчас тэлефоннай размовы Доналд Трамп і Абдул Гані Барадар абмеркавалі гістарычнае пагадненне аб перамірʼі паміж ЗША і талібамі, падпісанае нядаўна ў Катары.
Паводле заявы афганскай групоўкі, размова намесніка кіраўніка «Талібану» з прэзідэнтам ЗША доўжылася 35 хвілінаў, піша golos-ameriki.ru. Гані Барадар запэўніў Трампа ў тым, што «Талібан» імкнецца ўсталяваць «пазітыўныя будучыя двухбаковыя стасункі» з Вашынгтонам пасля вываду з краіны сілаў кааліцыі, у адпаведнасці з дамовай, падпісанай у суботу.
Падчас сустрэчы з журналістамі ў Белым доме, Трамп заявіў, што ў яго адбылася «вельмі добрая размова» з лідарам «Талібану». Барадар жыве ў Дохе, сталіцы Катара, дзе на мінулым тыдні ён падпісаў гістарычнае пагадненне з Залманам Халілзадам, спецпрадстаўніком Дзярждэпартамента па ўрэгуляванні ў Афганістане.
«У мяне вельмі добрыя стасункі з мулой. У нас сёння адбылася добрая доўгая размова, і вы ведаеце, яны хочуць спыніць гвалт», – заявіў Трамп, распавядаючы пра тэлефонную размову, якая стала першым такім кантактам паміж дзейным прэзідэнтам ЗША і лідарам «Талібану».
«Я думаю, у нас усіх ёсць агульны інтарэс… Мы былі там на працягу 20 гадоў. Іншыя прэзідэнты спрабавалі і не маглі заключыць любога кшталту дамовы», – дадаў прэзідэнт.
Размова адбылася праз два дні пасля таго, як афганскі прэзідэнт Ашраф Гані адмовіўся ад абмену палоннымі з паўстанцкай групоўкай, што зʼяўляецца ключавым кампанентам у пагадненні паміж ЗША і «Талібану». Ён адзначыў, што гэтае пытанне мусіць вырашацца па выніках унутрыафганскіх перамоваў (урад Афганістана не прымаў удзелу ў перамовах паміж ЗША і «Талібану»). Прадстаўнікі «Талібану» назвалі заяву Гані спробай сабатаваць мірную здзелку.
У аўторак у «Талібане» заявілі, што Трамп паабяцаў Барадару, што дзяржсакратар Майк Пампэа «хутка пагаворыць з Ашраф Гані, каб ліквідаваць усе перашкоды для ўнутрыафганскіх перамоваў».
ІІ belsat.eu