Прэзідэнт Літвы Гітанас Науседа заявіў, што ў Беларусі «расслаблена» ацэньваюць выбух каронавірусу і сітуацыя ў краіне значна горш, чым паведамляюць улады, перадае «Літоўскі кур’ер».
«Мы не можам давяраць гэтай інфармацыі, якую атрымліваем афіцыйна з Беларусі, паколькі я лічу, што беларускі кіраўнік ацэньвае сітуацыю з пэўнай бравадай», – заявіў 1 красавіка Науседа журналістам.
На ягоную думку, у Беларусі недастаткова добра спраўляюцца з крызіснай сітуацыяй, а рэальныя лічбы хворых могуць адрознівацца ад агучаных.
«Цалкам магчыма, што сапраўдная статыстыка значна горш, паколькі мы ведаем пра пэўныя агмяні на беларускай тэрыторыі і выпадкі смерці, якія фіксуюцца», – сказаў ён.
Ён падтрымаў прапанову кіраўніка МЗС Літвы Лінаса Лінкявічуса пра магчымае абмежаванне авіязлучэння з Беларуссю. Науседа лічыць, што варта абмежаваць кантакты «з краінай, якая не кантралюе сітуацыю, калі рызыка сапраўды адчувальная».
У Літве, паводле апошніх дадзеных, з пачатку эпідэміі зафіксавалі 537 выпадкаў каронавірусу, 8 смяротных зыходаў, 7 пацыентаў выпісалі.
КА belsat.eu