Эмануэль Макрон у інтэрв’ю выданню Economist заявіў, што NATO знаходзіцца ў стадыі мазгавой смерці. На думку прэзідэнта Францыі прычынаю таму зʼяўляецца ўсё меншае падтрыманне альянсу з боку ЗША.
Прэзідэнт Францыі Эмануэль Макрон між іншага выказаў сумневы, што NATO забяспечвае калектыўную бяспеку для сябраў альянсу. Мала таго, на думку Макрона, вывад амерыканскіх войскаў з Сірыі адбывалася без кансультавання з саюзнікамі.
«Цяпер мы маем справу з NATO, у якога адмірае мозг», – сказаў Эмануэль Макрон.
Кіраўнік Францыі між іншага выказаў думку, што краіны Еўропы, якія ўваходзяць у альянс, не могуць разлічваць на ЗША ў выпадку неабходнасці.
«Альянс можа функцыянаваць толькі ў тым выпадку, калі яго асноўны гарант успрымае сваю ролю сурʼёзна. Я б сказаў, што нам трэба перагледзець функцыі NATO у выніку няўпэўненасці ў тым, што тычыцца дзеянняў ЗША», – дадаў французскі прэзідэнт.
Эмануэль Макрон лічыць, што Еўропа сёння мусіць сама клапаціцца за сябе і несці адказнасць за свой лёс. Нездарма ў цяпер у палітычных колах усё больш грунтоўна абмяркоўваецца ідэя стварэння ўласнай вайсковай арганізацыі, якая абʼяднае ўзброеныя сілы краінаў ЕЗ.
У сваю чаргу кіраўніцтва NATO лічыць, што Макрон не мае рацыі ў сваіх выказваннях. А канцлер Нямеччыны Ангела Мэркель заявіла, што не згодная з выказваннем прэзідэнта Францыі.
СК belsat.eu
